Siemtû Pathien-in ei chêngna leilung lê a sûnga um po po a siem zo vawng â, “a ṭhâ” a tî hnung khawmin, bâwsietna suol leiin mihriem hlimna lê lâwmnain tâwp chin a nei â. Inremna dittû hâiin, inremnâ zawngna dinga silâi hmet puok ngâina ram, hnam bingâ ram neina dingâ hel ṭûlna ram, a rû no no suokna ram, milien lê hausâ thî nî a tiem sêng lo lâinatû lê sûntû kimna ram, mi rethei hai mangangna nî lê an lusûn niâ ngâisaktû invâina ram a nih.
Pathien ram tâ ding lê khawtlâng hma sâwnnâ, thâ le zung, thî le thâu sêngâ inpâk hlâw tlâk hâiin; hmûsit, hril siet lê dem siet an hlâwna ram lê châwimâwi phû hlie hlie hâiin, sawisêl an hlâwna ram a nih.
Sum le pai nei tam, mi bengvâr lê mi var hâiin, hmun ṭhâ an changna ram a nih â. Mânî hmasiel thiem lê ṭawngbâu tlawr hmang thiem hâiin, hamṭhatna lê ditsak an dawngna ram a ni tah. Indiknâ ngâinatû hâi tâ ding chun, rinum an tuor tlawk tlawkna hmuna â’n chang (a inchang) zo tah. Rethei chu hril lo, natna khirkhân takin a mi buok â, nei po po sêng vawng hnungin a tâwpah thîna kut deiin a mi man â, lungngâi lê thlase takâ inrûmin a mi siem hlak a nih.
Ûnâu dit tak, Ram nêl um lo khawvêla hin, nang chau rinum, lungngâi, beidawng lê rethei bîkâ inngâi nâw rawh. Mi hrâng lo fê hmasa hâi khawm, chuong ang takin an him bîk nawh. Sienkhawm, ram ṭha lem beisei annî leiin, tlânsan suokna remchâng hmu hâi sien khawm an nuom nâw a nih.
Ram nêl um lo hi lungkham hâi sien lâ chu, suknawmnatna lê vuokna hâi, kawl bun lê lung inâ khum, lungâ dêng hlum, berâm vun lê kêl vun silna po po chu pumpelin, suokna remchâng hmu hlê’ng an tih. Ram ṭha nâwk zuol beiseitû annî leiin nuom chênna khawvêl hi umna tlâka an ruot nâw leiin, thlalêra dâm, tlânga dâm, khura dâm, pûka dâm an khawsa ta lem a nih.
Ei chatuon ram Vân khawpui ei tlung huna chun, khawvêl suolin a lo inhliem ta hâi po po chun, vân silfênâ inthuomin, rângkachak tuol lâi ei lêng lem ding an’ tah. Tuipui angin, hmangaina fâwn vêl tâ’ng a t’â, inelrelna hrimin hmun chang ta bawk nâw ni. Thînâ hneâ ngamtû, Lal Îsû Khrîstâ inpâk lê châwimâwiin hun ei hmang lem ding an’ tah. Nun châu lê beidawng zing zingâ khawvêl hringnun lo hmangtû hâiin, thla muongna famkim nei tâ’ng an t’â (ti â), lungngâi, beidawng hmêl hrim hrim hmu ta bawk nâw ni hâi. Thîna leiâ inṭhê um ta nâw ni â, chatuonin hring lem tâ’ng ei tih.
Lalpâ tlâng thienghlim insuknat um ta lonaa chun, tuolchai tâ’ng ei t’â, mihriem dam kum chu, thingkûng dam kum angin sâwt tâ’ng a tih. Sakeibaknei lê bâwngchal chun bupâwl pet hmunkhat an t’â, nâupang lê ruol muk hâi chu tuolchai hmunkhat tâ’ng an tih. Satenê lê berâmtê hâi suilung ruol, laituol an lêngna ding ram, sâ lê mihriem dorâl bângna ding rama chun, ni khat chu ei la pâr suok ding a nih. Chû leiin, hî ram nêl um lo ramâ inthawk hin, ram ṭha lem ei hluo ding hi thlîr zingin kal pên ei tîu.
Be First to Comment