(Job 2:10)
Kum iemani chena inthawk ta khan Pathien zârin telephone hmangin nun beidawng ṭhangpui ngâi lê ṭawngṭâipui ngâi hâi tâ dingin hun ka lo hmang hlak â. Hieng ang rawng bâwlna remchâng tak mi petû Pathien kuoma lâwm thû ka hril rawp hlak. Chun nun beidawng ṭhangpui ngâi hâi harsatna lê an beidawng inrûm rî hâi hang hriet chângin hmêlmâ Setan sin thâw hâi hi sukmuolpho â Pathien hmingâ hnê pei hi ka nuom nâwk zuol hlak.
Chuong angâ rawng bâwlnâ ka nei pei lâi chun, ni khat chu nûpui pakhat (mi khawsa thei deu insûng lê an nâu hâi khawm lêkha thiem tak tak) chun, a nâupâ zu dâwn a nghawk thû lê an insûng harsatna thu ha hîpin a mi hung hril â. A nâupâ’n a nû halnâ a dawnna thû hieng ang hin a mi hril â, “Nû, ka zu dâwn chau hi i mi hrietpui â, ka khuoizu dâwn hlak khawm mi hrepui vê inlâ” tiin. Hî nûpui, nâu chungâ beidawng tak ang hin nû tam tak ei um ngêi khawm ka ring â. Hî hunâ nûpui beidawng kuomâ infuina thû a tlâwm a zâwng ka hril chu a hlâwkpui ei lo um tâk duoiin tiin hung suklang tum ka tih.
Nûpui-nû lê kan inbiek lâi zingâ Pathien Thû hung tlung chu, Job a hringnun lampui hrâw a nih. Job chu a nâu pasal hâi lê a ran ruol tam tak a chân vawng hnungin, amâ ngêi khawm a kepha-â inthawkâ a lu sîp chenin khuoihlîin a bâwm lâi chun, “I ringumna chu i la chel nghet tlat el a ni mâw? I Pathien chu ṭawng sie inphur lâ thi el rawh” tiâ a nuhmeiin hmangaina ṭawngbâu ni âwm takâ a hril chu, Job chun, “…Pathien kutâ inthawkâ thil ṭhâ ei hmu chun, thil ṭha nâw khawm ei hmu nâw ding mâw?” tiin a dawn â (Job. 2:7-10).
Job hringnun lampui hrâw hre zingin la hei ngâituo ṭha nâwk tâ. Pathien kuoma tuorselnâ ei hni â, tuorselnâ ei nei theina dingin hringnun thlipui a mî’n tuor tir â. Hausaknâ ei hni â, kawng tin rêngâ hausaâ ei um theina dingin retheina khura a mi thlâk hmasa nâwk â. Hrisêlna ei hni â, mi hrivawi sie hâi chungâ hmangaina insuo theina dingin bawrsâwm takin a mî’n umtir nâwk â. A dang hril ding tam tak khawm la um a tih, chuong hai po po chu Lalpâ’n Tirko Paula kuoma, “…ka thil thâw theina hi hrât nâwnaa i sawnnâw sukfamkimâ a um” tiâ a lo hril hin khai khâwm el ei tih.
A ni ngei einî khawm a chungâ nûpui pakhat lê Job nuhmei ang bawkin, ei harsatna lê buoina chau ei en chun ei thâw a pik hlak â, ei niâ lâwmna ding tam tak um khawm ei hrietin ei hmu ṭhel hlak a nih. Ei chêngpui (ei nâu hai, pasal, nuhmei, mo hâi lê tarpî-tarpû hâi) hi an sietna lê suolna chau thlîr lovin, khawvêl êng an hung hmû lê i kuoma an um ṭan tîrâ inthawkin vawisûn chenâ an hun hmang ta po po kha hang sui kîr nâwk lâ. I kuoma thla muong tak lê lungril har fîmin khawvêl hringnun an lo hmang liem ta hâi chu ngâituopui lâ, chû khêla vawisûn chena buoi thei lê lungngâina châng hre thei dingâ lungril har fîm tak hmangâ an hringnâ Pathien-in a hlâ zie dâm ngâituo ṭha nâwk lâ, lungâwi nâwna nêkin Pathien kuomâ lâwm thu hril ding i nei tam lem ka ring tlat.
Tiemtû dit tak, i vângnei zie hi î’nhriet suok thar theina dingin tû tâ i harsatna lê buoina hâi kha la hang ngâituo ṭha nâwk hrim tâ. Nang ang bawkâ nun beidawng tuok, mi tam tak chu lungril inrûm tlawk tlawk pumâ an chêngpui lê hmangai hâi chatuon hrem hmunâ um ding tî inhre ngâwi ngâwi thlânâ vûi liemtû tam tak an lo um ta a nih. Chuong lâi zing chun, nang ruok chu tû hin i chêngpui (i nâu hâi, i pasal, nuhmei, mo hâi lê tarpî-tarpû) hâi kuoma Chanchin ṭhâ hril lê Pathien-in a hmangai a nih tî inhriettir thei dingin hun ṭhâ pêk i ni â. I chêngpui hâi kuoma Pathien-in missionary sin thâw dingin i chunga mâw phurnâ lien tak â’n nghat chu taima takin phur suok dingin sunzawm pei tum rawh. An tâ dingin ieng tik lâi khawm Pathien hmaa ngîr tlat lâ, chatuon hringnâ an chang hmâ khat chu Pathien kuoma hni zing bawk rawh.
Chuongâ nûpui pakhat leh kan inbiek lâi zing chun an insûng harsatna thû a mi hung hril zawm pei â. A nâu hâi lêkha inchûknâ, sawrkâra lê NGO-a hâi sin ṭha tak tak thâw an nî ziet dâm, bandh, strike lê buoina dang dang leiâ an sumdâwngnâ, tî angâ a fê ṭhat nâw leiâ rawng bâwlna tieng an tlâk siet thû hâi chu inhnik takin a mi hril ta bawr bawr â. A thu hril lâi chu pawt chat pêkin, “Pî, i harsatna lê buoina chu ka hriet thiempui hlê che â. Kei chu tû tâ in sûngkuoin tlâk siet lâi lê rinum i tî lâi tak tawng phâk lo ding sûngkuo tam tak an um ngêi ka ring â, chu lâi chun keinî insûng khawm kan ṭhang vê a nih. Kei chu i hril ang khan um ngat lang chu Pathien kuoma lâwm thû hrilna ruoi ropui ka buotsai lem ka ring ngêi”, tiin ka hei dawn â. Second tâwi tê chu a to vang vang hnungin “Ê khai, Pastor-pâ i thu hril chu â’n dik ie mâw. Tû tâ kan insûng ngîrhmun a tlâk siet lâi niâ ka hriet tawng phâk lo ding sûngkuo tam tak um ngêi an ti mâw, chuong ang tiengpang hrim hrim chu ka lo ngâituo ngâi dêr nâw a nih. Pathien mal sâwmna ropui tak kan dawng hi mi petû Pathien kuoma lâwm thu hrilna ngîrhmun ditum tak chu keiin lungngâina ruomâ hnûk lût ka lo tum leiin ka nun a buoi a nih” tiin a hung inpuong suok ta â. A la hang inngâituo ṭha nâwk luo chun amaa chun revival chu a tlung dêr chu a ni ta el â. Pathien ropui râw se!
Mihriem-in thaw thei ei nei nawh tî inhre zingin inlâ khawm, ei chungâ harsatna a tlung chângin mâniâ sukfel tumin ṭhang ei lâk nâwk ang lawi si â, chû ruol ruolin ei thâw thei nâw ziet â’n lang nâwk nghâl hlak a nih. Pathien sukfel ding hi mihriem-in sukfel ei tum ṭâl hlak leiin ei buoi hlak â. Chû leiin, i chêngpui hringnuna khan buoi nâw lâ, amaa khan lungâwina lê hlimnâ zawng hmû tum bawk nâw rawh, chuong nâw chun nang kha buoi deu deu pal i tih. Lungril thlâk danglam theitû lê um loâ inthawkâ inumitrtû kuoma chun i phur rik po po kha nangin phur tum lovin amâ phur dingâ pêk suok chu hâdamnâ a ni lem si â. Chuong ang hmunâ harsatnâ, buoina lê vângduoina sûmpui sâ mup kâra, Pathien hmangaina hung inlang ding chu thlîrin, la hang inngâituo ṭha nâwk hrim tâ. Âmên!
Thlaphal ni 12, 2020
Be First to Comment