Lâwm Dân Thiem A Hlu – V. K. Pangamte

Ṭawng theina leili hi malsâwmna hlu, a tak le a lem hril nuom insâwk theina a nih. Patling ni taa Saihli hmanga vate per, sin taka nei chu thil inhme lo a ni a. Chu nêka la’n hme naw lem chu, patling le nutling ni ta zeta mi dem chîng hi a ni âwm ie. Thlaichi ṭha thlâktu chun a ra ṭha a sîk hlak a, a ṭha naw thlâktu ruok chun a ra ṭha naw a sîk ve thung.

Intheidana le inhmêlmâkna lungril neitu chun hlimna hmu ngai naw ni a, inremna le lungâwina zawngtu ruok chun hlimna thurûk nei a tih. Mihriem leili hi malsâwmna taksa bung-a thil thunun hne intak ve tak el, lungril thunun zo naw le inthuruola ṭhang an lâk a ni lem chun, hringnun chu sietna khur-a hnûk lût theitu a nih. ‘Mi dem hmang leili chun lungsen hmêl a kei pung’ (Thuv.25:23, DV). Chuleiin, fîmkhur taka ngaidân le nundân hmang a pawimaw takzet a, thudik  hril le zâwm bawk a tlo hlak.

Mihriem hi mâni sietna inhriet harsa ei ti a, mi dang sietna le tlin nawna ruok chu hmu fie ei thiem hlak. Hril thiem dâm, ziek thiem dâm, ṭawng thiem dâm, inchei thiem dâm a ṭha hle a, amiruokchu, mi dang lungril nat theina dinga thuom inbel ruok chu a hrisêl nawh. Khawvêla hin a var tak, a thiem tak, a mâwi tak, a hausa tak, a ṭha tak le a hlu tak tia inhnêmna tlâk a um tak tak si naw a; LALPAA bawk hlimna le lâwmna tluontling a um.

La ṭuoi ding hmuna hin ei chêng a, khawsak ei rêl inthuo bawk hlak. Hmu thei thil ringawta innghattu ta ding lem chun khuol inzinna lampui hraw ti a chieng a, bo el dinga innghat chu nakie insîrna a la ni thei a, hmu thei lo thil ruok chu chatuona ding a ni a; innghatna tlâk a tling. Lâwm dân thiem a va pawimaw de aw! Pawm dân thiem a va hlu de aw!

Tuta i ngîrhmun chie kha mi dang ngîrhmun leh tekhi dingin phal naw la, mi dang ang ni tum bawk naw la, Siemtu’n a dit dân ang chara a’n din che a nih. Mi dang i ni naw a, mi dang i ni thei bawk nawh; nang i nih. Rawngbâwlna le mawphurna chi dang dang a um thei a, kawng dang danga hril thei ni bawk a tih. I nina ang takin inlang la, silfên puopa hmanga inthuom lovin, chu taka chun, inpâk hlaw lem ngêi i tih. I phur a lo rik deu khawm a ni thei a, amiruokchu, phur ṭâl ṭâl la, LALPA’N sukhrât pei a ti che. Lâwm dân thiem chu a hlu mawl ie!

—– & —–