Mal Sâwmna Ṭawngṭâi (Benediction)

Mal sâwmna ṭawngṭâi (benediction) hi, kohran biek in inkhâwm ṭîn ding tâwmin, Pastor annâwleh kohran Upâ hâiin, inkhâwm hâi tâ dingin, Pathien kuoma ngênna lê inkhumna thû an insam hlak a nih. Mal sâwmna chungchâng hung thâw ṭan a nî dân chu a hnuoiâ Bâibul chânga hâi hin ziek a nih:

BSI – Number 6:22-27

Lalpâ chun Mosie a biek â, “Aron lê a nâu pasal hâi kuoma, hieng ang hin Israel thlâ hâi chu mal in sâwm ding a nih, an kuoma, Lalpâ-in mal sâwm chêuin, vêng pei râw se chêu; Lalpâ chu nangnî tieng hung ngha sien lâ, lung muongnâ pe râw se chêu, ti ro” tîin hril rawh. Chuong chun, Israel thlâ hâi chunga chun ka hming chu inchuongtirâ nî’ng a ti â, chun, keiin annî chu mal sâwm ka tih” tîin.

BFTW – Leviticus 9:22

“Chun, Aron chun, mipui tieng chun a bân a phar â, mal a sâwm tâwl â; chun suol inthâwina lê pum râw hmang thil inhlân lê inremna thil inhlân a inhlân zo chun a hung ṭum â.”

DV – 2 Kronikul 30:27

 ‘Thiempû hâi lê Lêvî hâi chu an tho â, mipui hâi chu mal an sâwm â, Pathien-in a lo ngâithlâk â, an ṭawngṭâina chun a chêngna Hmun Thienghlim vân chu a tlung si â.”

Hieng angâ hun hmang bîk hi, Pâ, Nâupâ lê Thlarâu Thienghlim hming lamâ, mal sâwmna thû insam a ni hlak. Thu sam hâi hi, Pathien thuâ um vawng nâw dê sien khawm, a ṭhen umna Bâibul châng hâi chu a hnuoiâ hâi hi a nih:

• “Tlu lo dingâ vêng theitû chêu, a ropuina hmaâ sawisêl bo lê hlim êm êmâ inngîrtir theitû chêu, Pathien um sun, a mi sandamtû kuoma chun, ei Lalpâ Îsû Khrîstâ zâra, ropuina hâi, inlalna hâi, thil thâw theina hâi, thu neina hâi, hun fê ta po poâ inthawkâ tûtâ lê chatuon chenin um pei râw se. Âmên.” [DV Juda 24, 25]

• “Remna Pathien ngêi chun in pumin sukthienghlim sien chêu, ei Lalpâ Îsû Khrîstâ hung phâ in thlarâu lê in lungril lê in taksâ a rêngin sawisêl boin inumtir râw se chêu. Âmên” [DV 1 Thessalonika 5:25]

• “Thlarâu Inthieng thil thâw theina zârâ beiseinâ in hau theina dingin Beiseina Pathien chun ring leiâ lâwmna lê inremna tinrêngin suksip râw se chêu. Âmên.” [BSI – Rome 15:13]

• “Lalpâ Îsû Khrîstâ lunginsietna chu in kuoma um râw se. Âmên.” [BSI – 1 Korinth16:23]

• “Pâ Pathien lê Pâ Nâupâ, Lalpâ Îsû Khrîstâ kuomâ inthawkin, lunginsietna lê, zângâinâ lê, inremna chu, thutak lê hmangainain in kuoma um râw se. Âmên.” [BFTW – 2 Johan 1:3]

• “Chun Pathien thla muongnâ chun in lungrila ro rêl râw se, chuong ang ni dingin taksâ pum khatâ ko in ni hrim in sawn nâw; lâwmna châng hre bawk ro. Âmên. [BFTW – Kolossa 3:15-16]

• “Pâ Pathien lê Lalpâ Îsû Khrîstâ kuomâ inthawkâ inremna lê ringnâ ṭhang hmangainâ ûnâu hâi kuoma khan um râw se. Ei Lalpâ Îsû Khrîstâ chuoi loâ hmangaitû hâi po po kuoma lunginsietnâ um râw se. Âmên.” [BFTW – Ephesi 6:23-24]

• “Lalpâ Îsû Khrîstâ lunginsietna hâi, Pathien hmangaina hâi, Thlarâu Thienghlim pâwlna hâi chu in rêngâ kuoma um râw se, Amen.”    [DV – 2 Korinth 13:14]

Khî takâ Bâibul châng ei hei târ lang hâi lâiâ hmang uor hlâw tak lê inlâr tak chu, 2 Korinth 13:14 hi a ni el nâw ding am a ni? Hî châng hi insam sâ a nî phâtâ, na hîptû lê ziekâ a um hunâ, mit kuoitû tak chu, Pathien-â pathum (Pâ, Nâupâ lê Thlarâu Thienghlim) tî ziek hi a nih. Trinitarian pâwl hâi tâ ding chun lung a thâwi damin, a sukthla muongthlâk hlê ring a um.

Lêkhabu râwn: EFCI Manual of Worship, Revised & Enlarged Edition, 2016.

Ziek dân:    Bâibul châng suklangâ um hâi khi, BSI, BFTW lê DV ziektû hâiin an inlet dân ang charâ ziek sâwng a nih. Thumal ṭhenkhat ziek kawp, ziek ṭhê lê ri infân (thlûk sei) hâi ruok chu ziek dân sukdanglam sin a nih. Ri infânna hmun thumala hâi sinsienâ pêk kim thlap a ni â, a lam dân ding khawm a sukchieng el bâka, a umzie a sukfie hlê bawk leiin.

[Sunzawm ding]