Ziektû lê hril fietû hâi chun, Nicea thu vawn hi, Arius inchûktirna indik lo lakâ inthawkâ, Kohran veng himna dingâ, Kohran hmasâ hâi lê ram bung ro rêltû hâi inthukawpâ an induong a nih tiin an hril.
Arius hi Alexandria-â Kohran Upâ a nih. Amâ ngâi dân lê ring dân chun, Pâ chau hi Pathien a ni â, Nâupâ lê Thlarâu Thienghlim hâi nêk khawmin a ropui lem. Nâupâ hin chu um ṭan hun a nei â, thisen a nih tiin a ring. Hieng ang ngâi dân lê inchûktirna hin, ringtû tam tak, ringna indik lampuiâ inthawkin a kei pêng thei ding angâ a ngâi leiin, Rome lal ropui (Emperor), Constantine khan, kohran ṭhuoitû Bishop 220 hâi, A.D. 325 khan, (Rokhâwmpui) a ko khâwmâ, Nicea-ah ‘Council of Nicea’ neipuiin, hî thû hi a chaipui a nih. Ro an rêl zo thu tlûkna dungzuiin, hî thu vawn hi an induong a nih.
Arius inchûktirnâ hi, kiem lê tâwp nêkin, a lain dar zuol pei niâ ngâi a nî leiin, lal ropui Theodosius khan, A.D. 381 khan, ‘Rokhâwmpui’, Constantinople-a a ko nâwk a nih. Chû ṭum chun, Arius inchûktirnâ suktâwp dingin ro an rêl thlûk â, hî thu vawn hi siem ṭhain, a hnuoiâ ang hin an induong niâ hril a nih.
Pâ Pathien pakhat, iengkim thâw thei,
Hnuoi lê vân lê thil po po hmû thei le hmû thei lo siemtû chu kan ring.
Lalpâ pakhat Îsû Khrîstâ, Pathien Nâu pakhat nei sun,
Khawvêl um hmaâ Pâin a nei chu kan ring â,
Varâ inthawkâ var, Pathien takâ inthawkâ Pathien tak,
Nei, siem ni lo, Pâ lê nîna hmun khat.
Thil po po hi amâ siem.
Amâ chu einî mihriem hâi sandamna dingin
Vânâ inthawkin a hung â,
Thlarâu Thienghlim sin thâwin,
Nunghâk inthieng Mari-a chun tisaa a hung inchangâ, mi hring a hung ni â.
Pontia Pilat thûin ei tâ dingin hem dêin a umâ,
A tuor â; phûmin a umâ,
Ni thum nia Pathien lêkha thû hril angin a tho nâwk â,
Vâna a lâwn â, Pâ chang tieng a ṭhungâ,
Mî thi lê mi hring ro rêl dingin, ropui takin a hung kir nâwk ding a ni â,
A ramin kin nî nei nâw ni.
Thlarâu Thienghlim hringna petu lê hringna Lalpa chu kan ring.
Amâ chu Paâ inthawkin a hung suok â,
Pâ lê Nâupâ le angkhatâ biek lê châwimâwi,
Zâwlnei hâi hmangâ thu hriltû a nih.
Apostle hâi inngîr suok huop zo Kohran Thienghlim hi kan ring.
Suol hâi ngâidamna dingâ Baptîsmâ pakhat hi kan pawm.
Mî thî tho nâwkna lê khawvêl um nâwk dingâ hringnâ chu kan thlîr.
Âmên.
Be First to Comment