Khawvêla râlthuom ṭhâ lê thil thâw thei tak tak a um. Tû lâi hnâi el khawm, India-in ram dangâ inthawkin indonaâ hmang ding vuongnâ ṭha chî inchawk a tum thû hâi Chanchin bua i lo tiem ngêi khawm ka ring. Khawvêl-in râlthuom ṭhâ lê thil thaw thei tak tak siem suokin nei sien khawm, mi mal nun, khawtlâng nun a siem ṭha thei nâwin, mi lungngâi lê beidawng hâi khawm a sansuokin, thla muongna kum hlun a pêk thei bawk nawh thû chanchin bu ka tiem lâiâ ka lungril ngâituonaâ hung lût â. Chû fê pei chun, ‘Thuom famkim el an’ (a ni) nawh’ tî thupuiâ hmangin, Pathien thû hei ngâituo nâwk ei tîu. Tû tâ râlthuom famkim ei hril ding ruok hi chu, man bo, inchâwkâ nei ni lo, Pathien-in a nâu hâi a thlâwna a mi pêk a ni lem.
1 Samuel 17:38-39 ei tiem chun, tleirâwl berâm vêngtû David, Philistine mi hrât do dingâ â’n thawk (a inthawk) suok hmâin, Saulâ’n David chu amâ râlthuom famkimin â’n thuomtir (a inthuomtir) â, dâr lukhum inkhumtirin, âwmphâw â’n hâktir (a inhâktir) â, kâwlhnâm â’n pâitir (a inpâitir) bawk. David tâ dingin, lal Saula râlthuom famkimâ inthuom chu a la thâw ngâi lo an’ (a ni) leiin, a hnawksak pêk leiin a hlîp thlâk thû ei hmu.
David-in Philistine mi hrât Goliatha a bei ding khan, Saula râlthuom famkim ṭha tak tak hâi kha a mamâw nawh. A san chu, a ring Pathien kha a hriet chiengin, a hun takâ ṭhangpui hlaktû a nih tî a ring tlat lei a nih.
Lal Saula râlthuom famkim hi mâwi lê nal tak ni sien khawm, David tâ ding ruok chun, hnawksakum a nî ang bawkin, einî khawvêl ropuinâ, inhawinâ, mâwinâ lê a châkna hâi hi, mâwi lê inhawi angin inlang hlak sien khawm, a tâwpna chu lungngâinâ, beidawngnâ lê muolphonâ mî’n tluntû (mi intluntû) chau an lo ni lem hlak. Chuong hâi chu, hmêlmâ Setan hin, ei tâ dingâ thil ṭha âwm takâ inlang hmangin mî’n thuom (mi inthuom) mâwi a tum hlak tî hriet tlat ding a nih.
Mihriem mit hmuâ mâwi tumnâ, mi inpâk hlâw nuomnâ, ṭhat tumna hâia ei inthuom hlak leiin, ei hringnun a hlim thei naw â, ei Khrîstien-na khawmin râ â’n suo (a insuo) tlâwm pha â, mî hâiin ei nia Khrîstâ an hmu thei ngâi naw a nih. Pathien ropuina ding ni lo thil dang ei buoipui lê ngâituo râwn leiin, hmêlmâ Setan hi ei nia a zalên hlak a ni tî hre thar ei tîu.
Thu hriltu chun, ‘I taksaâ inthawk chun thil ṭha nâw (suol/evil) chu sie hmang (put away/remove) rawh’ a mi tî a nih (Ecc.11:10). Mi tam tak chun, ei phur rik ding ei taksaâ ei sie khâwl lui tlat â, ei sie hmang nuom nâw leiin ei hlim ding angin ei hlim thei ngâi nâw a nih. Ei taksaa hin hling ang elin, suol mi sukna theitû a nih tî hre zingin, ei inkhâwl lui â. Chuong hâi chu, ei lungril mi kaptû lê ei thlarâu nun sukchâutû a ni tî hre zingin, ei hlîp thlâk nuom chuong nawh.
Ûnâu dit tak, ‘Âw ka hringna! Lalpâ chu inpâk rawh, ka sûnga um po po hâi a hming thienghlim chu inpâk rawh’ i tî theina dingin, i lungril ngâituona ṭha nâw po po kha hlîp thla rawh. Nangmaâ Saula râlthuom kha peihmang rawh. Chuong angâ insukfâi ngam hâi kuoma chun, Pathien-in hnênâ, hlimnâ, damna lê lâwmnâ a pêk hlak a nih.
Khawvêl râlthuom ṭhâ lê damdâwi ṭhâ hâi khawm, innghatna tlâk lê inhumhimna tak tak a tling zo chuong nawh. Chû leiin, hla siemtû’n, ‘Ei râlthuom chu Gospel chau hi a nih’ a lo tî angin, Pathien râlthuom famkimâ inthuomin (Eph. 6:13-18), nghet takâ ngîrin, hmêlmâ chu hmasuon dingin, ‘Lalpâ Îsû Khrîstâ chun inthuom lem ei tîu’ (Rom 13:14). Lal Îsû ṭhang lo chun, khawvêl hi hmasuon ngam chî an’ (a ni) nâw leiin, ‘Pathien einî tieng a ṭhang chun tûin am mi do thei a t’â (ti â)?’ (Rom 8:3) a tî angin, Lal Îsû Khrîstaâ inthuom â, a hringnâ inṭâwmpui â, a hniek hnung zuitû chun hmêlma hnê pei theina nun a nei a nih.
Be First to Comment