Ram lêng fê chângâ râwi upâ angâ kan en hlak, ka panthlangpâ, a ruol hâi chun WÂBÂ, THANGṬUO, PUSÛI, VUNDUK tî dâmin an ko hlak. Keinî nâupangin a khawlâi hmingâ kan ko vê phât a theidâ â, a mi kil fawk châng a um.
Ṭum khat chu amâ râwiin ka ruol hâi, John David, Dawnga leh kan pathumin Christmas pocket money tuokna ding tiin Tuilêluongah meihawl râwin kan fê vê â. Kan khuo hi tlâng bulṭhutâ um a ni â. Tlâng ei zuk lâwn liem â, hla rak loah Tuilêluong chu ei tlung nghâl el. Vadungtê, inhawi êm êm, sikul châwl kan nei châng insukhlim malamâ ka ruol hâi lê kan fê zing zingna hlak a nih.
Kan meihawl râwna ding tieng chu kan hei pan â, a hmun kan tlung ṭêp chun kan râwi upapâ’n mî’n kawppui a nuom ta nâw tlat el. “Nangnî a hranin, kei a hranin.” a ti el tah. Nâupang, Senior Department ni vê chau, meihawl la râw ngâi lo kan nî leiin bei a sukdawng hlê. “Mi zui ro i ti â, kan zui che â. Tû phing hin ie’m a t’â i nuom ta nâw?” tiâ kan zuk indawn chun â’n ngâituo vung vung â, “Thing zawng unlâ, a khur ding khawm nangni’n cho vawng in t’â, hung râwpêk ka ti chêu. Thing chu saw tieng muolâ mî saw nangnî chan, kei hi tieng hi ka chan.” a t’â, ramrî a mi siemkhum ta thlap el. A hmun kan tlung â, kan bu fûn hâi kan fâk zo chun thing zawngin kan invâk suok nghâl â. Vângneiin mî cho sâ, khur hlui kan tuok fu hlau â, ku chu ringin kan thing lâk hâi chu kan dêng lût â, a râwtû dingpâ chu kan lo nghâk â. Amâ khur a râw zo chun keinî khur a mi hung râwpêk ve â. Chuongchun, kan inlâwi ta â.
Zîngâ meihawl phawr ding chu nghâkhlâin helhawl kâ’n vawi â, zâna khawm ka in ṭha thei nawh. Zîng khuo a hung var chun phûr êm êmin kan inthawk suok â. Kan râwi upapâ khawm hlâwtling â’n beisei nasâ chu nî’ng a tih, a farnû meihawl phur dingin a țhuoi ngat a nih. A hmun kan tlung chun a lo kâng țha leiin kan hlim tlâng kher el. Meihawl kan phawr zo chun kan phur ding seng siemin in tieng kan pan ta â. Kan inhnu deu ta leiin lam chanvê kan tlung chun â’n thim fel dêr tah. Kan zuk fê pei leh kan ruolnu chun a phur a hung tet thlâk ta ṭhuoi el. Meihawl thi chieng lo a lo phur ni ding kha, a pâikâwng sûngah sen ver vurin an lo inlingpek â. Kan tui pâi po po kan bur khum khawmâ kan that hnê ta nawh. Vadung hlak a hla tah, zuk thâl phâk ding ni ta lo. Kan ûpâ chun “Zun khum ro.” a tî lê a tui salei hung phâwi â’n ruol â. Keinî khawm chun kan zuk ṭhût khum sap sap â. Khawm chun kan la that hnê chuong nawh. “Lam sak tieng ngha seng ro.” a hung ti nâwk â. Lam sak tieng chun kan ngha țhap â. A sangnû kuoma chun “Zun khum rawh.” a zuk ti vê nâwk â. Nuhmei zun chê chu a lo indar ṭha bîk deu am a ni ding, a zuk that mit el chu tie. Kan innui dawk ngam sî nawh, pê tat pê tatin a phur chu kan rûtpêk nâwk â. Vâl zûn phur ding nghâknû khan hî ṭum hin chu zun phurin in â’n lâwi lem an’ ta chu. Kan meihawl chu ṭîn khatah Rs. 10/- peiin kan zawr â. Pâi neiâ Û-Âmâ hmang kha chu a lo inhawi vê tho ie.
Be First to Comment