Sûm Lâwnin A Hlie Thim – V.K. Pangamte

Elvartu lâwm tuma sûna inbuotsai,
A lâwm nuom po po kim thei lovin;
DASANNGAM sûngril rila thu um,
Sangi zûna inuoi, vâl suilung lêng;
An mi dâwnpui inril beiseina inthup,
Martha sakhming sâm chu rê bîk lo!

Taksa hrisêlna ngaipawimaw tlatin,
HHS Campus-a infiemna ṭha tiemin;
Kan inlâwi tlâng diel diel, a ruolin,
Ni hriet zing tlâk le inchik tlâk niin;
Zân lalnu ṭha, Sawrthlapui nghâkin,
Hunin mi pêhêl lul naw raw se aw!

Ruoi inthang ṭhe nêka tlâwm ni lovin,
Sîngmi inlâwina rûn inhawng diem;
Siemtu malsâwmna dawnga thusep,
Septuhai thupui a thlum danglam ie;
Hrietpuituhai chu an mâwi ngawt el,
Lâwmna ri hrietna nâ a tlei hlie hlie!

Sa bêl inṭhut meuva lâwmna hlu nei,
A bung le a châng dang thlang lovin;
Hei ha! Hmangaina inzâm vêla chun,
Romantic huongsûnga inlâwi lûtin;
Sangi lêngna tlâng le muol ngaiven,
Inlang fie lo, aw chung Sawrthlapui!

Zân hun rê a sâwt hnung khawmin,
Chung lalnu sakhmêl hlietu inthuo;
Sûm lâwnin mi dâwnpui ve si lovin,
A mi nuor san hiel amani ding aw;
Inbuotsaina chu beiseina sukseitu,
Lung kim lo takin ṭîn zai kan rêl a!