COVID-19 hripui inlêng leiin inchûklâi, nî tin fâk fâwm zawngâ sin thâw lê khuolzin India ram sûng lê puo tiengâ um hâi chu, mâni sa himna zawngin, nî tin a sîng têl mânî hmun lê ram an pan sup sup a. Thu dangâ hril chun, ‘inko suokna rûnpui’, ‘suok dawkna rûnpui’, ‘mânî in panna rûnpui’ khawvêlin a tuok zing a nih. A va râpthlâk de!
Lota chun, amâ dit thlangnain, Moab phâizâwl chu, a chêngna lê fâk hmûna hmun dingin a thlang â. A tâwpa lem chu, Sodom khawpui chen rakin â’n tâwl (a intâwl) lût â (Gen.13:12). Sodom khawpuiâ chêng hâi suolna chun, Pathien lungsennâ a ko thlâk â. Genesis 19 ei tiem chun, Sodom khawpui suolna leiâ Pathien-in a suksiet ding leiin, Lalpâ vântirko-in Lota kuoma, ‘I hringna dingin tlân suok rawh’ tîin a hril â. Lota mâkpâ hâi chun, fiem thu hril ang chauvin an ngâipêk â. Vântirko ṭawngbâu, ‘Tlân suok rawh’ tî thupui hmangin, Pathien Thû hang ngâituo nâwk ei tîu.
‘Tlân suok rawh’ tî chu, mâni umna ding hmuna um lo hâi kuomâ umna ding hmun tak pan ding’ hrilnâ a nih. Sodom khawpui ang bawkin, ei chêngna khawvêl suolna hi Pathien hmaa, a rî a nasa ta hlê niin â’n lang (a inlang) tah. Khawvêl hi a châknâ, ropuinâ lê inhawi tîna pumin a boral mêk chu an’ (a ni) tah. A sûnga chêng hâi khawm, suolna chitin rêngin a mi beiin, a mi suknat tâk lei hin, châu zoin, ei thi mêk pei chu an’ ta hi! Ei hriet angin, tû lâi COVID-19 natna ṭibâium hripuiin khawvêl a tuom mêk â. Hî hrî hin, thî dân pângngâiin a mî’n thîtir naw â, thî hnung khawmin, ei sakruong polythene lê damdâwi hmangâ tuom ngâi, invûi hun indik khawm mî’n nghâktir (mi innghâktir) thei ta lo lê, â’n rang (a inrang) thei angâ invûi liem ngâiin a mi siem ta a nih. COVID-19 hrî nêkâ natna lê hri ṭîum lem khawm ei la hmasuon pei ding niin â’n lang (Matt.24:7).
Lota kuoma, I hringna dingin tlân suok rawh tî hmang bawk hin, vawisûn hin einî khawm ei umna hmun â’n dik (a indik) nâw chun, muongchâng lê suonlam siem lovâ inhmâw takâ tlân suoksan dingin Pathien thûin a mi hril a nih. Lota mâkpâ hâiin, Pathien thu fiem thu thâwna ang chauvâ an ngâi ang khan, einî khawm ni vê pal ei tih tî inlâu a um hlê. Tû tâ i umna hmun khan, chatuon khawpui a ṭhuoi lût thei nâw chê chun, ‘tlân suok rawh’. Hî thua hin, mî tû khawm ei innawr lui thei nâw lâi zingin, Pathien-in hun lâwmum, sandamna nî a mi pêk hun hi a sâwt ring a um ta nawh. Mi lûlul, mânî um nawna ding hmunâ um, tlân suokna châng hre nâw hâiin, Îsû Khrîstâ nei lovâ, thîna vadung an pal kâi hun a tlung phât ruok chun, insîrin umzie nei ta nâw ni. Khâw lâ’m (lâi am) i um â?
Ûnâu dit tak, thil ṭha thâw dingâ Khrîstaâ siem ei nî ang hrimin, khawvêl mâwinâ, ropuinâ, hausaknâ, inlâr nuomnâ, ṭhâ lê fel intînâ, dûâmnâ, mânî inchâwimâwina hmun hi i umna hmun dinga buotsai an’ nâw leiin, ‘tlân suok san rawh’, a nêkâ ṭha lem Pathien-in chatuon khawpui, lâwmna lê ropuina â’n hlân (a inhlân) lem ding chê a nih.
Be First to Comment