Mihriem mizie puitlingnâ hi kum tamin a hril tak an nâwin, chun kum upat lê nâupang hi â’n khîna indik tak ni theiin â’n lang nawh. Entirna dingin: Tû hin kei a nêkâ kum tiengâ nâupang, amîruokchu mizieâ, kei a nêkâ puitling lem tam tak ka hmu â. Chuong ang bawkin, kei a nêkâ kum tiengâ upa lem ni sî, kei a nêkâ sawngnâwi lê nâupang ka hmu bawk.
EFCI Executive Council chun kum 2020 kohran thupui dingin, ‘Khrîstien Nun Puitling’ tî a thlang â. Hî thupui sirsan hin, Pathien Thû, ‘Khrîstien Nun Puitling Ze Mâwi’ hang ngâituo tlâng tum ei tih.
Mâw phurnâ a hriet:
Mihriem dâna, mi puitling chun a mâw phurnâ a hriet â. Nâupang ruok chu inchûktir lê hril hriet an ni nâw chun insûnga, mâw phurnâ neiin an inhriet nâw leiin, insûng sin ṭûl tam tak a um lâi khawmin thawveng takin an um hlak. Mi puitling ruok chu, hril lê tir hranpâ ṭûl lovin, insûng khawsaknâ ngâituonain ṭhahnem ngâi takin sin a thâw hlak. Chuong ang bawkin, kohran hi sûngkuo lien tak inzawm khâwm ei ni â, kohranâ um hâi chun kohran inṭhang lienna dingin ṭhahnem ngâi takin sin an thâw hlak a nih. Mi puitling chun, amaa mâw phurna um chu, thâw dingin hril hriet a ngâi hran nâw ang bawkin, Khrîstien Puitling khawm rawng bâwlna lê Khrîstien kalchâwinaâ a mâw phurnâ, hieng – thâwlâwm pêk, Biek in inkhâwm, Bible tiem, ṭawngṭâi, sâwmâ pakhat etc. hâi hril hriet a ṭûl ta ngâi nawh. Khrîstien Puitling chu Pathien ram tâ dingâ mâw phurnâ a phur suok dân lê thilpêkâ inthawkin hriet thei a ni hlak.
Thil iengkim a dawng sâwng thiem hlak:
Nâupang tî takah, thil hriet thiem harsâ an tiin, an thil dit thâwpêk nghâl nâw lem chun an nuor zui nghâl hlak. Sûngkuo sin inrêl fel nî khuoa mi puitling chun a nuom nâw zâwng khawm lo ni sien, insûng ṭûlna lê mamâwna leiin thiem takin a dawng sâwng hlak. Kohran-a hin, Kohran Committee-in, pâ chan changin ro a rêl hlak â. Committee chun, kohran lâiâ mî, an mizie, thilpêk nei lê an inhnikna zâwng hâi thlîr pum zingin, kohran sûnga, rawng bâwlna kâupêng hran hran ṭhuoitû dingin mî a ruot hlak. Khrîstien Puitling chun, kohran-in, rawng bâwlna lê inzawmâ chanvo an pêk chu, a bulâ inthawk, a tâwp chen phûr takâ hlen tumin lungâwi tak lê phûr takin sukpuitling a tum tlat hlak. Chun, a tî nâw zâwng deu Kohran Committee-in a rêl châng khawmin, chier inhruoi el lovin, iengkim thiem takin a dawng sâwng lem hlak.
Harsatna hmasuon ngam kawnga:
Nâupang chu harsâ lê rinumnâ a tuok chângin a tlânse hlak â, inhawi a tî zâwng ruok chu a hnawtin a hnawt lem thung. Mi puitling ruok chu, harsatna lê rinumnâ a tuok khawmin, pal tlang hrâm hrâm tumin, ṭhang a lâk hlak. Harsatna lê rinumna hmunah Khrîstien Puitling lê puitling lo nun â’n lang chieng nuom bîk hlak. Khrîstien Puitling chun, a hringnuna, thil iengkhawm hung tlung sien, a lampui hrâw lâi mêk rinum sien khawm, chuong hâi chu a pumpel zâwng lê tlânse el lovin a hmaâ um chu huoisen takâ hmasuonin a tâwpa, hnênâ lê mal sâwmnâ a dawng hlak a nih. Khrîstien Puitling chun kohran a ngûi lê châu lâi tak khawmin sel tak lê ringum takin a thâw fan fan hlak. Chun hmêlpâin (Setan), a insûng, Kohran a sukbeidawng lâi khawmin, in nam kûn el lem lovin, Pathien thil thâw thei tak kuoma a tlu lût lem hlak.
Lungril nghet neina kawnga:
Khrîstien Puitling nî ding chun, lungril nghet, ngîrna (principle) nei a pawimâw a nih. Ei ram Khrîstien ei puitling thei nâwna lien tak chu lungril nghet ei nâw lei lê phûr thut Khrîstien mizie ei nei lei a nih. A huou huou ei lâwm â, thâwk le khatin ei phûr hlut â, sâwtnâwtea mazu mei angin ei inzui tla nâwk â. Pathien thu hriltû danglam deu lê a thu hril mak danglam an hung inlâr phâ, chû âwn zâwng chun ei tlu duol duol hlak. Khrîstien Puitling nî ding chun, kohran ziding nghet pângngâi zui tlat hi a him tak â, chun a tlo tak bawk a nih. Umna hmun izirâ danglam el ngâi lo, Lalpâ tâ dingâ inser hran ngam lê lungril nghet takâ ngîrna bîk nei hi Khrîstien Puitling nînâ a nih. Ngîrna bîk nei lo, lungril bulbâl nei lo, hmâi inzâ zâwng hâi hma bulâ thu dik ṭan ngam lo, mânî ṭang hmasiel hi Khrîstien Puitling ze mâwi a ni ngâi nawh.
Intât hriem peina kawnga:
Hmangruo chu hmang tlâk a ni ding chun, tât hriem a pawimâw êm êm. Khrîstien tam tak ei puitling thei nâwna san chu, puitling dingin ei intât hriem nâw lei dâm, ei niâ thilpêk (talent) lê thil pêk (gift) hâi ei phur suok zo nâw lei dâm, mâniâ thâw suok theina (potential) um hmang tum lovâ, mi dang kutâ ei innghat talaw lei dâm a nih. Ei intât hriem nâw leiin, rawng bâwlna lien lem lê hlâwk lem ei nei theina ding hâi ei chân khawm tam tak um mei a tih. Khrîstien Puitling ni ding hin, thiemnâ, theinâ, varnâ, mi fel lê bengvâr tak va nî kher hi a pawimâw tak an’ naw â, puitling dingâ intât hriem lê inpêk hi a ni lem.
Pathien le inpâwlna kawnga:
Pathien lê inpâwlna, hieng – ṭawngṭâi, Bible tiem lê Biek in inkhâwm hâi hi, Khrîstien Puitling chun a ngâi pawimâw hlak. Mî, Pathien lê inpâwl, inbe tam hâi chu, an hringnun a hlim â, an nia thlarâu tuihnâng a suok tam â, an niâ thlarâu tuihnâng um chu mi dang tâ dingin fâk a tling hlak. Ringtû inti sî, Pathien lê inpâwl tam lo nanâ nâ chu, a bulin phûr hlut hâi sien khawm, a sâwt a seia, a ṭâwl deu deu hlak a nih.
Â’n hawi lê hlimna hmun ringawt zawngâ tlân kuol, mânî inlâwinâ Kohran hmu ṭâwl tlatin, ‘thlarâu bu fâk ding ka hmu nawh’ tiâ kohran puo tiengâ thlarâu bû, fâk ding lâwr khâwmtû hâi hin, an ṭâm hnêmna ding chu an hmu el râwi maw? Khrîstien Puitling nîna ding ruok chun, Kohran puo tienga hin inṭhang lienna lê puitlingna ding khawp fâk ding ṭhâ a um nawh.
Dân le inkeiṭhuoinâ zâwmna kawnga:
Kohran hin, mûmal takâ kalchâwina ṭhâ a nei theina dingin, Dân (Constitution) lê Inkeiṭhuoinâ (Bye Laws) a nei â. Chuong Dân lê Inkeiṭhuoinâ chu, Krista kuomâ mi ṭhuoitû a nî leiin, Kohran-in a siem Dân lê Inkeiṭhuoina hnuoiâ um lê zui hi thu âwina lê Khrîstien Puitling zie pawimâw tak a nih. Chû leiin, Khrîstien Puitling chun, Kohran Dân lê Inkeiṭhuoina chu â’n zâin (a inzâ) a palzût el ngâi naw â, Dân kal zâwngin ro rêl a tum ngâi bawk nawh. Kohran ṭhuoitu hâiin fîmkhur takâ an thu rêl hâi lo sawisêl a iengmâ lovâ ngâi â, ‘thlarâuvin a thawk ang peiin’ tiâ kalchâwi hlak hâi hi Khrîstien nâupang zie a ni lem.
Khrîstien Puitling nî ding hin, kum upâ, nâupang lê ṭhang kin a um thei nawh. Khrîstien Puitling thei lo, hma sâwn thei lo, hma sâwn dingâ kal pên bawk lo, Pathien Thu hrietnaâ inṭhang lien tum lo, thlarâu tiengâ sawngnâwi lê nâupang zie neitû hâi hi, an puitling thei nâw leiin, Hebrai ziektû chun, ‘a hun ngâituo chun inchûktirtû ni rau ta âwm in niâ chu, Pathien thû, a bulâ inthawkin inchûktir in ngâi nâwk ta â, bu rum ni lovâ, nêne tui la ngâi mî in hung ni nâwk ta hi’ (Heb.5:12) tiâ Juda ringtû lê hnungtawl mêk hâi a zilna thû hre zingin, Khrîstâ thu bul hril ta lovin Khrîstien Puitling zie mawi tak nun suokpui dingin Lalpâ’n mal sâwm râw se che.
Be First to Comment