Zeng, Bethesda dîl a fâwn châng khawmâ, mâniâ tho dawk tum hrim hrim lo, mi dang kei tho fâwm nghâk â, mî chungâ innghat tlat lê, mi ṭhangpuina nâw chun damna ding hmun pan nuom lo ringtû hâi khawm hi um thei a nih. Bethesda dîl bulâ zengin suonlam a siem kha, Lal Îsû Khrîstâ’n suonlam puitlingin a ngâi nâw leiin, “tho rawh” tiin, tho dawk dingin thû a pêk lem a nih.
Taksa natna nei chun, a damna dingin doctor/hospital a pan hlak â. Thlarâuvâ natna nei ruok chun, sukdamtû pan elna châng khawm a hriet naw â, camp lê crusade a nghâk hlak. Khawvêl hun lêr tieng hin mi tam tak el chu nawr lui ngâiâ ei um tlat hi a pawi tak zet a nih. Pathien Thlarâu chun, thâw lui, tir luinâ ni lovin, a fielin a mi fiel lem a nih tî hriet a ṭhâ. Nawr luina nghâk pâwl hâi hin, chatuon hremhmun an liem nî chenin nghâk an tih tî inlâupui an um tak zet a nih.
Mânî khâtâ tho dawk thei lo dingâ siemtu chê lê tho dawk thei lo dingâ khuop bet tlattû chê, hieng – ngâithânâ, thla muongna tehlêm, beidawng lonâ, mânî insitnâ, thabonâ, Pathien ngâisak nawnâ hâi, piengthar sî lo, piengthar uniform inhâktirtu chê, rawng bâwl thei lo dingâ pawt ṭhung tlattû chê dâm, dâwizepna dâm, natna hâi hi i la thlâkhlâ zing am a ni? Hieng hâi hi i mâksan naw â, i tho dawkpui nâw chun, an la sukmuolpho tho ding chê a nih.
Ûnâu dit tak, chatuon hringnâ i chang theina dingin, tû hin i umna hmunâ inthawk khan tho dawk rawh tî thû hi, i tâ dingâ chanchin ṭhâ chu a nih. I mi mal hringnun lê program-â Îsû dit nâw zâwng thil um hâi chu, Îsû hmingin sût ngam lâ, tho dawk dingâ thupêk chu i kuoma khawm a tlung tah.
Inṭhung annâwleh zâl zing lovin, i umnaâ inthawk khan Lalpâ’n tho dawk dingin a ko chê a nih. Inâwi lovin tho el rawh.
Be First to Comment