A Thutiem Inkhêl Ngâi Lo Lalpâ – Lallienzawn @ Zawni Hmar

1. Buoina ram khawvêla, hringmî changâ hung seilienin,
   Hril siet, hneng dêna kârâ râl do ding ei nih.
   Huoisen takin râl hmaa chun tlân se loin,
   Hnê ngêi ei tih, mi ṭhangpuitû Lal Khrîstâ zârin.

Châu lê ṭiâ zâm zâi rêl el loin,
Tuipui luong lâi sukchâwlâ, nî le thlâ khawm chel ngîrâ.
Natna tinrêng sukdamtû lê mi thi hnung chen khawm kei thotû,
Daniel hâi ruolcham sanhimtû Pathien kha a la pângngâi zing a nih.

2. Khrîstâ sipai hâi hnung tâwl loin hmâ tieng pan peiin,
   Pathien râlthuom famkim hmangin râl do ei tîu.
   A ṭûl chun khuoi lê riel hmangâ râl hnêtû khan,
   Setan râl hrâng hrât tak chu mi hnêpêk ngêi a tih.

3. Harsatnâ, rinumnâ hril ruol lo ei tuok châng khawmin,
   Tuorsel lê ringum takin Lal rawng bâwl ei t’â.
   Ṭhangpui ngâi hâi ṭhangpui hlaktû ei Lalpâ chun,
   Mi thlâthlam loin mi chel a tih, ieng lâi khawmin.

4. Lungngâina lê beidawngna hâi tuok châng um hlak a tih,
   Ei tlâksam, ei tuor khawm Lalpâ’n a phal a nih.
   Sienkhawm a thutiem inkhêl ngâi lo Lalpâ chu,
   A ropuinâ inlang suok a tih, iengkim chunga.

5. Âw! ringtu hâi, huoi takin râl chu hnawt zâm pei ei tîu,
   Thlêmna phâivuo hrângin mi nuoi vêl hlak sien khawm.
   Ei himna di’n Khrîstâ thlazâr hnuoi bel ei t’â,
   Hmêlma dorâl chun iengkhawm mi lâw thei ngâi nâw ni.