Rûn Sûng Suklumtû – Lallienzawn @ Zawni Hmar

1. Mi hmangaitû, ka chûn nun nêm, rûn sûng suklum hlaktû.
   Fam rolung sukpung di’n, fam rûn i bêl nî khan.
   Hril kan hai ie, rûn sûng riel ang a dei zo tah.
   I hrailêng hâiin, luoithli nûl kan bâng thei nawh.

Kan ngâi êm chê âw, chûn nun nêm, mi hmangaitû.
Suilung â’n lêng, ngâi lâi i zuol ngêi ie.
I sûlhnunga, Riekmâw vâ ieng kan invâi ie.
Nâu ang kan tlei thei nawh, chûnnû i ṭhang nâw chun.

2. Hring khawvêla hin, tuor thiem thei dingin kâ’n ring naw ie.
   Lunglâi a nâ, ka chûn nun nêm muol liem dân hi.
   Hnêmtû dingin, lenruol hâi an hung pung khâwm â.
   Mi hnêm zo an um nawh, ka chûn fam zûn ngâi hi.

3. Sâisenteâ mi lo châwi lientû âw, ka chûn nun nêm.
   Ngâi lâi kan bâng thei nawh, hun liem hnung hâi thlîrin.
   Harsatna lê beidawngnâ i lo tuor muol suo.
   I hrailêng hâi ta di’n, mi hrâng i tling zo ie.

4. Ka tawn mangâ i râuthlâ lêng, dâr ang tawng châng nî hin.
   Lâwmin kâ’n nui hlak, hlim lâi nî hâi a hung thar.
   Sienkhawm hâi ang ṭhangin, ka hang zawng vêl ruoi â.
   Tawn mang chau mâw a lo nih, tak chang thei sî lo.

5. I râuthlâin va fang vêl hlak raw âw, ka chûn nun nêm.
   Kan thâi kâwi lâiril thu sim, i fam rolungah.
   Damlâi zân thim hmang zoâ kan hung inlâwi phât.
   Mi lo tuok ngêi raw âw pielrâl kawtsuoa, tî’n.