Beisei Naw Rawh – V.K. Pangamte

Thudik i vawng a, i țan bawk a,
Thu țha i hriet a, i hril pei a;
Mâwina i dit a, i nei zing a,
Hlimna thurûk i zawng a, i kawl a;
Inremna i dit a, i hmang mêk a,
Inpâkna beisei hran naw rawh.

Thuziek i taima a, i ziek ngêi a,
Lekhabu i ngaina a, i tiem taima a;
Hlasak în hnik a, în chûk țâl țâl a,
Fiemthu i lâwm a, i thaw hlak a;
Țawngbau i thiem a, i fîmkhur a,
Mî inpâk beisei chuong naw rawh.

Inchei i uluk a, i nal êm êm a,
Thu hril i thiem a, zuitu i hau a;
I hmêl a țha a, i langsâr vieu a,
Pawisa i nei tam a, i hausa hle a;
Ram dang dang i sir a, i vângnei a,
Mihriem inpâk beisei naw rawh.

Ruol siem i thiem a, an zui che a,
Lemziek i pei a, i hung inlâr țan a;
Inkhêla hming inthang i n’a, a țha a,
Zîrtirtu sin i thaw a, i ringum a;
Hlawfa sina i fe hlak a, i titak a,
Mi po po inpâk beisei naw rawh.

Sin insâng i chel a, i hamțha a,
I pieng a fûk a, an dit bêk bêk che a;
Hotu i n’a, țhuoitu ei mamaw a,
Sumdâwng i tluong a, i burip pei a;
Hretu che an pung a, an fiel che a,
Amiruokchu, beisei insâng naw rawh.

Bethel, Tuiṭhaphâi, Changer ni 2, 2020, dâr 7:15 a.m.