Ka Ngai Cheu – V.K. Pangamte

Zieklung chela thiemna rûn ril bêlin,
A hawnpuia lung lâwmna thu hrilin;
Zîrtirtu hmathlîr inṭâwmpui ang elin,
Inchûkna hmun ngai taka pawmin;
Hma tienga thil tlung ding a kimtê’n,
ICI High School a mâwi chuong ie!

Inchûkna rûn pakhata um zing chu,
Pakhat hin thil po po kêp vawng lo;
A pângngâia um chu pângngâi lovin,
Pâwl sawn a um pei anga insawnin;
1, 2, 3…, A AW B…Z le A B C…Z bâk,
AG High School ngai a um ngêi ie!

Châm sawng nawna rama lêngin,
Ruol hlui le ruol thar hai a kawptê’n;
Lunglai an hluo sip, ngai an um ie,
An sakhming tluon le an hringnun;
Hriemmi sûngril rila a châm zing,
CTS High School ka ngai êm êm el!

A dawt dawta inzâwt kim ding chun,
A bula inthawk ṭan pei a ṭûl âwm ie;
Khawsâwt thumal hei sâm ringawtin,
Zûn ngai nei ta dingin, a zuol pei si;
Chêngna hmun le tlâng a dang zova,
Nghil thei lul naw ning, inchik ka tih.

Pakhat chau ngaia intawmna bânin,
Nghâknu sakhming sêl chuong lovin;
A hlui ngaina khawm nêp inthuo lo,
Intuok lai huna a thar hril inthang;
Ziek meuva ngaina thu a tlar tlarin,
Ka ngai êm cheu, dam zing ro aw!

Bethel, Tuiṭhaphâi, Changer ni 1, 2020 dâr 9:40 a.m.