Hawktui Kawr – V.K. Pangamte

Ngaiven le hriet hlaw si lova thil pawi,
Vawi le chang, suk le tung inlawn vêl;
A hmangna ding nêka a danga pikin,
Hrisêlna ta dinga ṭha lo ti a chieng a;
Hawktui luongna nala chu nal zo lo,
Hmunhnawk bûmna kawr a chang ie!

A se sie khâwmna le peina kawr sei,
A lampui hraw thei hlawl lovin a ping;
Ṭawng si lovin hriemmi le inlîrthei,
A rim chau ni lova a têl têla tirdakum;
Hnung le hma uluk nawzie a suklang,
A hun taka sie le ṭha hrietna tiemin.

Khawsakna hmun le ram hei dâwnin,
A ṭangkâi ding thil ngainêp a, sietna;
Hawrawp len hmanga langsâr vurin,
Hâwp le hmuom, inruithei le rûkru;
Hnâwltu le dit nawtu ringawt, kim lo,
Lungril ril a se chun, tum a hlawsam.

A khang le a dunga inlawnna lampui,
Inṭhangna chi khat hmu ding a um a;
Sawrkâr kut ringawt nghâk leiin maw!
Chawkpawl nun chu a ṭha lul naw a;
Faina le thienghlimna nun, a mâwi,
Mâni mawphurnaa bel, hawktui lam.

Nghâk nei lo thei lova sin inhnu a um,
Anachu, mi dang ta khawm en sa a;
Hmasielna chu siel thlungna ni lovin,
Duâmna khawm fâk dukdak nawna;
Nang le kei ei ṭhang tlâng tlat a ngai,
Hawktui kawr enkaitu sin, sin ko ṭûl.