A hrana thuneina pêk chu ni si lovin,
Lungril rila thu châm zing a um leiin;
Vântlâng hrieta puong kher tum lo,
A tak a um lai zinga a tehlêm hmang;
Whatsapp Group, Facebook le a dang,
Hming tehlêm sie chu mizie tehlêm.
Inmilpui naw lei ela râla kâp puokin,
A hmuna thu chieng lem hril ṭî angin;
Ieng anga thupui ṭha khawm a nêp a,
Thu le hla tienga suina thu ziek dâm;
Kohran le khawtlâng chanchin tiemin,
Hming tehlêm inbûk a pui sei nawh.
Hi hi chu mimal chungchâng tia chel,
Sêl thei le hril thei dinga inlang lo;
Anachu, hei ngaituo chet chet chun,
Zalênna hmang dân hrim mâwi zo lo;
Account tehlêm innghatna a buoi,
A tehlêm ring leiin nun tehlêm a um.
Hmêl hlim sara suklang a hadam a,
Nêl suol ruok chu a um intlar thei;
Puo tieng nun le sûng tieng nun,
Inang naw taluo ringawt chu a’n têp;
A’n lang dâna thutlûkna nei chu,
Hming tehlêm bêl suol anga inchin.
Hming tehlêm khêla nun tehlêm mak,
A dawta la tehlêm inzâwt nâwk pei;
Inzak um lo ti leia sukdik tum miel lo,
Hieng anga ngaisam nun inlâr mêk;
Ṭhang la hung thar pei ding hai lai,
A tehlêm ngaituona ma lul raw se!
Be First to Comment