Tui Luongna Ruom – V. K. Pangamte

Vadungte le vadungpui hai infinna,
Hringnun leh, tekhi thei khawpa fie;
Tlâng insânga inṭanin, hmun inhnuoi,
Hriemmi hrâtna hmang a, chel ruol lo;
Hun a liem pei, kîr zai hrim rêl lovin,
Tui luongna ruom thlîrin, lungril a na!

Thing le ruo humhal chungchâng,
Duot hlaw lo, pâr ang a ṭuoi mêk a;
Saram hrâm thiem, rannung rûn In,
Enhla lova râl ang hrâng, a pawi ie!
Chêngpuitu tam tak, sêl el mâwi lo;
Tui luongna ruom, inrieng a chang!

Leilung hausakna le mâwina hrein,
Lâwm ang intuok meuva, duot takin;
Sietna intluntu ni lovin, hmangaitu,
Hringmi sûngrila pieng, châm tlatin;
Nunnêm inthanga hril, ram enkaitu,
Tui luongna ruom, innghil lovin aw!

Vâla le nghâknu thu tin saia inrem,
A ṭhat thei dân a la um, famkim si lo;
Tlângram dum duoi, lung a dum zo,
Dem bîk naw la, pawm thiem lem la;
Siemtu kutsuok, dâwn chieng a ṭha,
Tui luongna ruom, pêhêl lul lovin aw!

Hun ṭha le hlu a la um, siem ṭhat hun,
A la ṭuoi ding, dang ruol lova chieng;
Sak, Thlang, Sim le Hmar, mi tin ha’n,
Hung hre thiem mawlin, ram humhal;
Khawsakna bu zâwl, dân indik zuiin,
Tui luongna ruom, damna ruom aw!