Thlasietna chi dang dang nei a,
Dâk suok ngam lova inthlahrung;
Inhnik zâwng le thil tum ban lovin,
Mi dang nêka chîn le châu lem a;
Mâni ning ninga innam kûn nun,
Tho vat la, tha tharin pu nâwk rawh.
Chang ngêi tuma i thaw ṭâl ṭâl a,
Hnung tieng hlawsamna le sietna;
Hma tieng hlawtlingna le nun ṭha,
Petu chun a pêk nuom che hrein;
Sawisêltu le hmusittu kâra khawm,
Zâm naw la, mi ropui i la ni thei ve.
Rorêlna khâwl a buoi vieu thei a,
Vawi tam tak dam thei lo ang hielin;
Hnâwlna le lâwm nawna tuok hun a,
Suokna lampui um lo khawpa invâiin;
Harsatna tuipuia pil anga nun rinum,
Kawtkhâr dang a la um, ngîr det rawh.
Ieng anga hlu le ṭha khawm nei la,
Mi po po sukhlim thei ni si lovin;
Hnung tienga dotu um lei ringawtin,
I tumruna le huoisenna tlu se lovin;
Hriemmi inpâk ring tum chu tlâwmna,
Mi hrât le hrisêl i nih, pawm el rawh.
Hringnun hi hlawsam a, hlawtlingna,
Beidawngnaa inthawk beiseina thar;
Hling kûnga inthawk pâr mâwi tak,
Intângnaa inthawk zalênna hmuin;
Zân inthima inthawk sûn var umin,
Châwl naw la, thaw ṭâwk ṭâwk rawh.—-
Bethel, Tuiṭhaphai, Thlazîng ni 22, 2020
Be First to Comment