Khawvêl Inthlangpui – V.K. Pangamte

Thla nei ang hielin a vuong vêl a,
Rosum tam luota inhnelpui angin;
A nei le a nei naw inkâr hlat ziet,
Thuneina le nina chang tuma intâlin;
A mâwi zâwng le a ṭha puopa chelin,
Inthlangpui boruok hîp tam, sietna!

Hmun tin le ram tin a hrût kim a,
A kim laia harsatna le buoina hnâr;
Țawngkam thiemnaa sukdam thei lo,
Inṭhena ditum lo intlun hiel, a pawi;
Sûng le sûng inlaichinna a sukbuoi,
Khawvêl inthlangpui leiin nun a rik!

Inthlang hmaa thu hril le intiemna,
A ṭha naw ding um lo khawpa nâmin;
Sienkhawm a hming mei meia tâwp,
Tawitê sûng ding chauva ruol ṭha;
Khawtlâng le hnam insûng dam lovin,
Khawvêl inthlangpui, innghatna lem!

Inthlangnaa tling le tling lo umdân,
A tam lem chu chapona sala intâng;
Mâni inhriet chieng chu a harsa hrim,
Hriltu an um laia insiem ṭhat mawlin;
Lungril ril inbûkna hmuna châwlna,
Khawvêl inthlangpui ngîrna, a châu!

Châwl ka tum a, thu thar a la um pei,
A hlui ring nêk hlawla ngei lem ding;
Chung tieng thu le hla ngaina takin,
Hotu hnuoia châwl hadam thei lovin;
Țhuoitu rorêlna hnuoia himna kulpui,
Khawvêl inthlangpui hi la ṭuoi ding!

Bethel, Tuiṭhaphai, Thlazîng ni 23, 2020, 6:15 a.m.