Thilpêk (Talent) – Joshua Neitham

Thu hmer bîk : Talent (inherent, inborn).
Bâibul châng thlang : Rom 11:36, 12:6-8, 1 Kor. 10:31, 1 Pet. 4: 10 – 11

Q. Khawvêlâ i hung piengna san tak ding âwm hi i lo ngâituo vê ta hlak am?

A. Rom 11:36-a chun, “Amaâ inthawk lê amâ zâr lê, amâ tâ dingin thil po po a hung um a ni si â; amâ kuoma chun chatuonin ropuina chu um râw se. Âmên” tiâ ziek a ni nâw am a ni?

Thilpêk (talent/noun) umzie::

Sâp ṭawngin, ‘thilpêk’ umze inhnaipui tak chu, a tlukpui ding âwm chu, ‘talent’ tî hi a ni el âwm ie. Thilpêk hi ei piengpui, einiâ inphûm rûk, hmang lê sawr ṭûl hunâ pholang, suklang a ni hlak. Mi dang lakâ i danglam bîk rieuna san chu i piengpui thilpêk, nangâ um thil thâw theina lei kha a nih. Piengpui thilpêk hi tât ngei lê sukṭhat zuol thei ni sien khawm, inchûk fâwm thei a ni nawh. Bible-a ngêi khawm, mihriem hâi hin piengpui thilpêk ei dawng thû ziek a nih. Thil thâw awlsam ei itî bîk deu, thâw inhawi ei ti bîk bawk hâi hi piengpui thilpêk hâi chu an ni tlângpui hlak.

1 Peter 4: 10 “Mi tinin, Pathien lunginsietna tinrêng enkawltu ṭhâ angin, Pathien thilpêk an dawng hâi taphawt chu hmangin rawng inbâwl tuo seng ro.”

Thilpêk nei a pawimâw ziet:

Pathien-â inthawkin ‘thilpêk’ dawng vêin i inhriet am? Inen chieng lâ, hei indap sin tâ, ieng am a ni rêng. I thilpêk dawng i hriet nâw chun, i hringnuna hin thlamuongnâ, hâdamna lê hlimna tak tak um ngâi nâw ni. Ieng thil khawm thâw lâ, râ ṭhâ insuo thei chuong ngâi nâw ti nih. A petû chun, ieng tik lâi khawm a lâk kirpêk thei chê a nih. Nangâ um, Pathien thilpêk hre suokin, Pathien ropuina dingâ i hmang phât le chau, i hringnun khan umze inthûk tak hung nei thei a tih. Vânâ ei Pâ, ei Pathien chun, a nâu hâi hi puitling inlâ, amaah intuk lût inlâ tî ami nuompui hlê a nih. Hieng thilpêk ei dawng hâi hi hmang ṭhangkâiâ, amâ rawng bâwl dingin konâ ei dawng hlak a nih.

Ieng leiâ thilpêk dawng am ei ni â?

Pathien thil tum chu, Khrîstâ taksâ siem puitlingâ a um theina dingin, a mî hâi insingsattir hi a nih, “Chun ṭhenkhat hâi chu tirko ni ding dâmin, ṭhenkhat hâi chu zâwlnei ni ding dâmin, ṭhenkhat hâi chu chanchin ṭha hriltû ni ding dâmin, ṭhenkhat hâi chu kohran châwmtû lêinchûktirtû ni ding dâmin a pêk a” (Efesi 4:11-12). Pathien thil tum lê nuom dân chun amâ rawng bâwl hi a nih.

Thilpêk hâi chu: 

Khrîstâ taksâ, a kohran hâi hin, ei rêngâ ei ṭhathnempui tlâng seng theina dingin thilpêk hâi chu a sem diem diem a nih. 1 Korinth 12-a chun Pathien thilpêk hâi chu hriet thei a nih. Chuong ṭhenkhat hâi chu – Thlarâu inhriettirnâ, Thlarâuvâ chun varna thû, ringnâ, sukdam theinâ, thil mak thâw theinâ, thu hril thiemnâ, thlarâu hâi hriet dik theinâ, ṭawng hriet lo chi dang dang hmangâ thu hril theinâ, ṭawng hriet lo hâi hril fie theinâ, tirko, thu hriltû, inchûktirtû, thil mak thâw, sukdam theinâ, ṭhangpui theinâ, ro rêl thiemnâ, ṭawng dang dangâ thu hril theina thilpêk hâi dâm an nih.

Pathien-â inthawkâ piengpui thilpêk ei dawng hâi chu hieng hâi hi a ni thei. A khâw tak hî’m (hi am) i thilpêk nî’ng a t’â (ti â) leh?

Thu hril, inchûktir, ri mâwi, hlâ tieng hrim hrim, tlâwmngâinâ, lem ziek, thu ziek, thil dang dang siem, electric tieng hrietnâ, khâwl tieng thil hrietnâ, ṭawng inlet, inngâi tlâwmnâ, ṭawngṭâinâ, mî sukphûr thiemnâ, rem ruot thiemnâ, ro rêl, hla inchûktir, solfa vai, keyboard hmet, ṭingṭang per, inkhâwm ṭhuoi, thâw lâwm pêk, in bâwl, thuomhnaw siem, puon ṭhuoi, thlâi suong, zâidâw, inrem nâw hâi sukrem, damnaw enkawl, mî an inâ kan lê ṭawngṭâipêk, thil chei mâwi, rethei hâi ṭhangpui, harsa hâi ṭhangpui lê sukhrât, lâm, hlim theinâ, lem ziek, lem chang, sum kawl tiengâ ringumnâ, mî lo mikhuol thiem, mî lo mikhuol theina lê lo lâwm thiem, thlalâk, banner siem, thu phuok, tha hrât, rem hrietnâ, thurâwn petû, sum lam lût, thâwlâwm dâwl, ringna hrât. Ṭhahnem tawk tak chu a um.

Thilpêk ei idawng hâi, hriet awlsam dân:

Thil thâw lo ding thâw chun, hlâwkna lê hlimna nêkin, rinumnâ, lungsennâ, muolphona khawm tawng thei a nih. Chuleichun, Pathien thilpêk hi hriet chieng theina ding chun, amâ bawk râwn a ṭûl hlak. Nangâ inphûm, thilpêk hâi i la hriet nâw a ni chun, hieng ang hin hriet a awlsam el râwi mawh? Inen fie dân ṭhenkhat –

(a) Thil thâw inhawi tî bîk rieu i nei am?
(b) Thil thâw awlsam tî bîk deu i nei am?
(c) Hun âwl i nei phât leh ieng thil am thâw nuom bîk deu i nei hlak?
(d) Ie’m (ieng am) i thâw phât leh inpâk i hlâwin i hriet hlak?
(e) I nungchang lê i mizie khan, inpâk a hlâw bîk deunâ?
(f) Thil ṭhenkhat, harsa lê thâw pei nâw ngâwi ngâwi dâm i nei hlak am?
(g) Inâ intawmâ, um mûm el lo ding. Pen suok lâ, thil dang dang thâw sin rawh. Nangmaâ inphûm rûk, thil ṭha tak tak hâi a hung pâr suok theina dingin, boruok, dâwkân lê hmun remchâng zawngin siem sin rawh.

Piengpui thilpêk chu, hmangna ding hun a hung um phât leh a hung inlang el hlak a nih. Kum a hung tam peiâ, taksâ a hung inṭhang lien pei hin, ei thilpêk nei hâi hrietna lê hriet chieng zuolna hi a hung vê pei el hlak chu a hawi. Hieng ang hung pâr suokna ding chun, ei khawsaknâ lê umna hmun khawmâ a lo zir vê a ṭûl hlak. A kârchâng chu, thil ei inchûk fâwm am a ni ei tî zing lâi hin, ei niâ thilpêk inphûm rûk kha a hung pâr suok ta hlak a nih. Ei hei inchûk chun, man lê thiem khawm awlsam ei ti bîk hlak. Chû leiin, mâni thilpêk ieng am a ni â tî hriet theina dingâ thil hei thâw sin hâi khawm hi a pawinâ um dêr lo a nih.

Thilpêk ei idawng hâi, a hmang dân:

I thilpêk dawng hâi chu ieng tiin am hmang i t’â? Pathien-â inthawkâ thilpêk ei dawng hâi hi chapopuiin, uongpui ngâi nâw mei nîu. I ropuina ding, inlârna ding, hming ṭhatna ding lê i mi mal hlâwkna dingin i hmang ding am annâwleh, Pathien ropuina ding lemin i hmang lem ding? Thilpêk hi mi mal thil dawng ni sien khawm, mi mal tâ ding, sawr ding nêk hmanin, Îsû Khrîstâ kohran hâi tâ ding lem niin â’n lang (a inlang). Taksa kâupêng nêkin, taksa tâ ding a ni lem. Pathien thil thlâwnpêk ni sien khawm, khâw lâia hmang ding am? Hmang dân ding hâi chu, thâwtû ding kutâ innghat a nih. A thâw dân chungthua ruok chu, a mâin mâw phur lem a tih.

Matthâi 25:14 ziek ei tiem chun, ‘talent’ ei dawng hâi hi sie ṭhat nêkin, sukpung hi ei mâw phurnâ a nî lem ziet thû hriet thei a nih.

1 Korinth 10:31 a chun, “Chû leiin, in fâk khawmin, in dâwn khawmin, in thâw taphawt chu, Pathien ropuina ding chauvin thâw ro” tiâ ziek a ni nâw am a ni?

1 Peter 4: 10 – 11-a chun, hiengâ ziek a nih. “Mi tinin, Pathien lunginsietna tinrêng enkawltu ṭhâ angin, Pathien thilpêk an dawng hâi taphawt chu hmangin rawng inbâwl tuo seng raw hâi se. Mî tû khawmin thû a hril chun, Pathien thû hâi angin hril râw se; mî tû khawmin rawng a bâwl chun, Pathien-in hrâtna a pêk ang peiin bâwl râw se; chuong chun, Îsû Khrîstâ leiin, Pathien chu, thil iengkima châwimâwiin um thei a tih, ropuina lê ro rêlna chu, chatuonâ amâ tâ a ni si â. Âmên.”

Ṭhangkâina ka nei vê nawh:

Ṭangkâinâ nei dêr lo angâ inngâi châng i nei am? A kârchâng chu, ruol ban pha lo ang dâmin i inhriet hlak am? Israel hâi khan, Goliath an huphur ang elin, huphurnâ lien tak dâm nei châng i nei hlak am? A lo ni chun, beidawng nâw rawh. Mi tinin ei hringnun a hin “Goliath” ei nei seng a nih. Nisienkhawm, mi tin hin, ṭhangkâina kî ei nei seng tî ei Pathien thûin a mi hril a nih. Mi pakhata hin thil thâw theinâ ieng kim pêk a ni nawh.

Rom 12:4-8-a chun, “Taksa pum khatah, pêng tam tak ei nei â, a pêng po po sin thâw chu a inang vawng naw â. Chuong ang bawkin, einî tam tak ni inlâ khawm, Khrîstâ-a chun taksa pumkhat ei ni â, a mal malin inpêng tuo seng ei nih. Lungsietnâ ei kuomâ pêk ang sengin, thilpêk hran hran ei nei seng â, thu hril ding a ni chun, ei ringna phû tâwk peiin hril ei tîu. Rawng bâwl ding a ni chun, ei rawng bâwlnaa chun inpe tlat ei tîu; inchûktirtû khawmin inchûktir tlat râw se. Mi infûitû khawmâ infûi râw se; thil petû khawma inro lovin pe râw se. Ṭhuoitû chun taima takin ṭhuoi râw se; mi lunginsiettû khawmin lâwm takin lunginsiet râw se.” tiâ ziek a ni nâw am a ni?

Mosie khan thu hril a thiem naw â chum Pathien-in a hmang nuom tho. A âiâ ṭawng dingin Aron a ruot. Pathien hi rem ruot thiem a nih.

Beidawng nâw rawh:

Vawi tam tak, hmûsitna ṭawngbâu, deusâwna ṭawngbâu, ngâinêpna ṭawngbâu, sukzawina ṭawngbâu, sukphûr nâwna ṭawngbâu hâi khawm hrein dawng hlak mei i tih. Hieng ang lung sukhnuolna ṭawngbâu lê thil hâi hin i thlarâu a sukzawi rawng rawng hlak am?

Thilpêk neiâ i inngâi nâw chun, Pathien ngên rawh. Pathien ropuina ding a ni phawt chun, ei tâ dingâ ṭhâ, mî hâi ṭhangpuina ding a ni phawt chun, i hnîna chu sukpuitlingpêkin um i tih. A dawn dân chê chu i beisei nâw dân kî dai khawm a ni el thei.

John 14:13-14 “Chun ka hmingin ieng khawm in hnî taphawt chu, thâw pei ka tih, Nâupâ leiâ Pâ châwimâwiâ a um theina dingin.”

Luke 11:11 “Nangnî lâiâ pâpui pakhat him a nâupâin bei hni sien lâ, lung a pêk dî’m (ding am) a ni? An’ (a ni) leh, ngâ hni sien lâ, tûin am ngâ âia rûl a pêk ding?”

Âw ṭhalâi,

Thuhriltû 12:1-2 ziek hi tiem lâ, a hnuoiâ indawnna hâi khu hei ngâituo sin hrim hrim tâ.

“I vânglâi nî hâia chun, nangmâ Siemtû chê chu hre zing lâ, kum hâi a hung hnai â, ni ṭha nâw hâi a hung tlung hmâ lê; chû huna chun, “Annia chun inhawi tîna ka nei nawh,” i tîna hun a hung tlung hmâ hin.”

Indawnnâ/Zâwnâ:

1. Pathien-â inthawkâ thilpêk i dawng kha, mi dang ṭhangpuina dingâ i hmang nâwna hun kha a lo sawt vieu ta am?
2. Pathien-â inthawkâ thilpêk i dawng ni sîin, nang a ropuina lê hming ṭhatna dingâ thlêmnâ i tuok kha, ieng thilpêk am a ni â?
3. Thilpêk i dawng chu ieng tiin am hmang i tum â? Pathien ropuina lê a ram tâ dingâ rawng bâwlna dingâ hmang ṭan a hun ta naw mâw?
4. Hî khawvêl rinum tak el hi, kum nâwk, tû kum, thla nâwk, tû tâ thlâ, tû tâ kâr, vawisûn, tû tâ dârkâr, tû tâ minute, tû tâ second sûng ngêi hin mâksan ding lo ni ta lâ, thlamuong deuvin, lung âwi deuvin i liem thei chie ding am?
5. A siemtu chê Pathien leh, in inhmu phât leh, ieng am hril ding i nei vê ding?

IENGKIM EI THÂW TAPHAWT CHU, PATHIEN ROPUINA DING NI LEM RÂW SE. ÂMÊN!