Lungril A Sukthar Ie! – V.K. Pangamte

Ni le dârkâr, kum le thla liem peiin,
LALPA hmangaina zâra unauhai;
Rûn hmun khata inlâwi zing lovin,
Ngai naw lei ni lova lêngna dang;
Damlai nun tiem thiem a harsa ngêi,
A ruola lêng zing nuom a um hle ie!

Lalram hmangaitu indik chu damin,
Harsatna le beidawngna kâra khawm;
Hnuoi hringnun a ṭuoi mêk lai hin,
Thlarau hringna chang dinga ṭhang;
Hlun lo rama châm sûnga sukfelin,
Thuthlung thienghlim vawng tlatin.

Famkim nawna rama chêng sengin,
Hlimna le lâwmna ti khawm a tâwi;
Isu Krista taksa enkawlna sin chelin,
Chapona le uongna thil chu hnâwlin;
A taka nunpui mawl chu a tlo lem a,
Ringum taka Lal sin thaw a pawimaw.

Chanchin lâwmum le hlu tak ngaiin,
Râwl mâwi le nun mâwi intuokna;
Thisen man tam taka intlan niin,
Kalvari khêl tienga hmangaina zûn;
Sandamna tlungna hmuna châwlin,
Bêl ding tak chu Isu Krista a ni si a.

Ṭi lovin zâm bawk naw la, fe pei rawh,
Hnung tienga dona ri chu dawn lovin;
Chatuon In tlung hma chu sel takin,
Hnuoi lâwmman hnawta buoi el lovin;
Sûng kima Jerusalem hluo dingin,
Fîmkhur taka hringnun hmang a hlu.

Bethel, Tuiṭhaphâi, Thlaram ni 30, 2020 dâr 10:00 a.m.