Mr. John Lalruotsang Tusing (Sûnna Thusam) – V.K. Pangamte

Lung kimtea duthu ei sâm vêl laiin,
Thina kut deiin a her tliek ta maw!
Hnuoi hringnun a tâwi dân dâwnin,
Hringmi lung mâwlin harsa a ti ie;
Fam thlipui hung hrângin a liempui,
Nghil chang lo ding, Zuopa ngaium!

Hmangai chûnnu le hraichâwi chan,
Zuopa ṭhang naw chun lung a na!
Lainatu la hung ṭîn zo ngêi ding,
Ngai ngam hrim um lova invâina;
A sâwt naw ngêi maw, Zuopa nun,
Ṭhe dingin thu ei la tiem lul naw ie!

Rûn suklumtu le sukhlimtu Zuopa,
Fam khawpui inlâwiin hnung a nghil;
Thei chang sien, hringnun la tiem a,
Hlimpui le rempui ei la nuom hle;
Natna khir tak bâwm leia dam zo lo,
A mak tia ko kîr thei ta si lova pawi!

Pâr anga la ṭuoi thei taksa rama hin,
Sîng za tam laia nun beidawngin;
Tuok naw le pumpel thei bîk um lo,
Lungriem mitthli a far zawi zawi;
Theina tlâwmtê bêk nei ni inla aw,
La liem lo dinga chel fan fan ding.

Thei sun chu râl puon châwia sûn,
Hieng ang hin ngainatna thusam:
‘Hmangaitu LALPA, kan hung kûn,
Hriemmi chan inrieng hi nghil lovin;
I kuoma chatuon hringna ditum chu,
Zuopa John chunga lo tlung raw se!’

Bethel, Tuiṭhaphai, 1:55 PM, Thlazîng ni 23, 2020