Lêngkhuoi Hawn Mâwi – V.K. Pangamte

Pâr buk bâwmtu lêngkhuoi hawn,
Hnêmtu zûna biethu thlum hrilin;
Siemtu induong rûn mâwi inhuolin,
Ruom le tlâng intluon an tiem a;
Hmêlma râl anga hrâng beisei lo,
Thlîrtu sîngmit a dam hlie hlie.

Ṭawngkam thiem leia dawn ni lo,
Bûkte zar sûnga thu tin sai vêlin;
Lampui pik hnung chu nêr peiin,
Ring phâk lo tawng meuva ngîrin;
Sietna intluntu dinga thu rêl lovin,
An mâwi ngêi ie, lêngkhuoi hawn.

Tum ram neiin an lêng diel diel a,
Bukthing zâr bêlin châwl an rem;
Leilung hausakna phurtu changin,
Hriemmi lungril rila hnâwl lovin;
Pawm ve chu insîr um lo dingin,
Lung an sukdam, lêngkhuoi hawnin.

Ṭhâlpui le favâng hun chai kawpin,
Piengna hmun tlunga lâwm inruol;
Thlier bîk um lova pawm damin,
Tuk lo ram fang a, beiseina pan;
Kîr hrim rêl si lova lunglaia chel,
Hei dâwn ve la, lêngkhuoi mâwina.

Ṭhiekna kut suong chu a tlo naw a,
Fâk le dâwn thil chau ngaituo lovin;
Sawisaktu le suomtu mizie hnâwlin,
Malsâwmna tiem thiem a pawimaw;
Inrempui ding chu pakhat nêka tam,
Lêngkhuoi hawn humhal a ṭha ie!

Bethel, Tuiṭhaphâi, 7:15 a.m. Thlaram ni 21, 2020