(L) Upa Darliensung Sûnna Thusam
Thiemna le hrietna zung inthûk nei,
Hmar hnam ta dinga ban pawimaw;
Theina zâwna hma tieng pan peiin,
Chanchin hrietin lung a ṭhâwng hiel;
Dawn thiem ka’n mâwi thei lul nawh,
Thina kut deiin a man dân hrim hi!
Sûnna thu inzâwt chu duthu sâm ni lo,
Rûn In sukmâwitu le el vartu ringum;
Ṭhena thu tiem dinga lung rem lovin,
Thlier bîk nei lo, thina thlipui tuokin;
Châwi lai le hlim lai hun a tâwp thu,
Hriemmi nuom dân khêl tieng a tlung!
Ziek mi le thiem mi ril tam tak hrilin,
Sakhming hluo mâwitu a tling hle;
Sienkhawm hnuoi ram hi hlun lo,
Hmangai hai inlâwi sawngna ni lovin;
Pakhat khata inzin suokna ram niin,
Upa Darliensung-in a tuok a ni maw!
A kim nawna ram hi thlaphângna,
Hringnuna thil tuok ṭhenkhat a nâ;
Dampui zo ruol lovin a tâwk el ta hi,
Lainatu intuok dân a danglam ie;
Luoithli far zawi zawia thu intlarin,
Dâwnril tama dang zo ruol lo maw!
A dam hai theina a tlâwm tak zet a,
Sûnna râwl khawm inruol kher lovin;
Ṭawngkam mâwi le incheina tiemin,
Sûnna nâ hi a nêp deu thei ding am?
A tlin zo le a thiem deu um an tî’m?
Mangṭha! Mangṭha! Pu Darliensung
Bethel, Tuiṭhaphâi, 3:30 p.m. Thlaram ni 25, 2020
Be First to Comment