Mâni Inthunun – V.K. Pangamte

A hmasa le a nuhnung um angin,
Thaw hmasa le hril hmasa ding;
Mi narân taphawtin hre seng lo,
Hma tieng fena ding kâwkhmutu;
Thiemna le varna suong suol lovin,
Mâni inthunun chu lampui inṭanna.

Sie le ṭha hrietna hmang indik pei a,
Inṭhena suksuoktu lungril ril hnâwlin;
Mi dang ta dinga malsâwmna ni a,
Dam sûng hun tawitê tiem laiin;
Chapopui ding ieng am a um a?
Mâni inthununna khau taka umin.

Châng dang le hla dang pêl hrim,
Hla tak le sei tak phâk thei lovin;
Thlawptu an tam leia det kher lo,
Mimal nun inen chieng a pawimaw;
Pâwl sûng po pova damna thil,
Mâni inthunun dinga inbuotsaiin.

Sum ngaina taluo chau naw khawm,
Insûm ding thil a lo tam ngawt el;
Ṭawng insûm hrâm hrâm dâm a ṭûl,
Fâk le dâwn ngaithatu nun a buoi;
Hrisêlna chu selna le inzawm tlatin,
Mâni inthunun chu nun entawn tlâk.

Khawpui hnetu nêka ṭha lema hril,
Châwimâwina nopui dawm a phu;
Huoisen tia hriet inlâr kher ni lovin,
Dâwizep leia tlânsan nun ni hnai lo;
Ṭhang le thar laia fe pei dinga ditum,
Mâni inthununna hlapui a taka remin.