Sâwmâ pakhat hrilâ a umnâ Bâibul châng hâi:
Genesis 14:20
“I hmêlmâ hâi i kutâ petû Pathien chunghnung tak chu inpâkin um râw se,” a ti â. Abram chun amâ chu iengkim sâwma pakhat a pêk â.”
Genesis 28:22
“Hî lung phun ka phun khawm hi Pathien in nî’ng a tih: chun, ka kuoma i mi pêk ding po poa chun sâwma pakhat chu pe ngêi ngêi ka ti chê,” tîin.”
Lêvî 27:30-33
“Ram sûnga mî, sâwmâ pakhat po po, thlâi amani, thei râ hâi khawm, LALPÂ chanpuol a nih; LALPÂ tâ dinga thil inthieng a nih.
Miin a sâwma pakhat a ieng khawm intlan a nuom chun, hmun ngaâ ṭheâ hmun khat a bel ding a nih.
Ran ruol lê berâm ruol lâia sâwma pakhat, hmawl hnuoia lût a sâwmna pei chu LALPÂ tâ dinga inthieng nî’ng a tih.
A siet lê a ṭhat a fie ding a ni naw â, a thleng ding a ni bawk nawh; a thleng lui chun, a thlengna leh a pahnî chun thil inthieng nî’ng a ti â, intlan nâwk thei ni nâw ni,’ ti rawh,” tîin.
Nambar 18:21
“Levi thlâ hâi chu rawng bâwl sin, puon in rawng bâwl sina an sin thâw mana Israel ramâ sâwmâ pakhat po po hi ka pêk a nih.”
Nambar 18:24
“Israel thlâ hâiin sâwmâ pakhat LALPÂ tâ dingâ a thêna thên thil inhlânna chu Levi mî hâi rochan dingin ka pêk a nih; chuleiin, an kuomah, ‘Israel thlâ hâi lâi rochan nei nâw ni hâi,’ ka lo ti ta sâ hrim a nih,” a ti â.
Nambar 18:26
“Chuong thua nâw khawm chun Lêvî mî hâi chu hril lâ, an kuomah, ‘In rochan dingâ Israel thlâ hâi sâwmâ pakhat ka pêk chêu, anniâ inthawkâ in dawng phât chun, chû sâwma pakhatâ chu LALPÂ kuoma a thêna thên thil inhlân dingin in inhlân ding a nih.”
Nambar 18:28
“Chuong ang chun Israel thlâ hâi lâia inthawkâ sâwma pakhat in dawng po poâ mî chu, LALPÂ tâ dinga thên thil inhlânna dingin in inhlân vê pei ding a nih; chun, chû LALPÂ tâ dinga thên thil inhlân chu thiempû Aron in pêk ding a nih.“
Deuterawnawmî 12:6
“Chû taka chun, in pum râw hmang thil inhlân hâi, in inthâwina hâi, in sâwmâ pakhat dâm, in thên thil inhlân hâi dâm, in thutiem dâm, in nuom thuâ thil inhlân hâi dâm, in ran ruol lê in berâm ruol lâia pieng hmasa tak hâi in hung lâk ding a nih.”
Deuterawnawmî 12:11
“LALPÂ in Pathien-in a hming inumtirna ding a ruot ding hmunâ hung lâk dingâ ka tî po po, chu taka chun in hung lâk ding a nih, in pum râw hmang thil inhlân hâi, in sâwmâ pakhat dâm, in thên thil inhlân hâi, LALPÂ kuoma thutiema in tiem ṭhâ ṭhâ hâi le chun.”
Deuterawnawmî 12:17
“In ina chun sâwma pakhat, in bâ dâm, in uoin dâm, in hriek dâm lê in ran ruol lê berâm ruol lâia pieng hmasa tak hâi, in thutiemâ mî dâm, in nuom thuâ thil inhlân hâi dâm, in thên thil inhlân hâi chu fa thei nâw ti nîu â.”
Deuterawnawmî 14:22
“Kum tin in loa thlâi suok po po sâwmâ pakhat in sie hran ngêi ngêi ding a nih.”
Deuterawnawmî 14:23
“LALPÂ in Pathien ṭîna châng in hung hriet rawp theina dingin in bû lê in uoin lê in hriekâ sâwmâ pakhat lê, in bâwng ruol lê in berâm ruol lâia pieng hmasa tak hâi chu LALPÂ in Pathien hmaah, a hming umna dinga a la ruotna dinga chun in fâk ding a nih.”
Deuterawnawmî 14:28
“Kum thum a invawi kum poa, chû kumâ in lo thil suok po poâ sâwmâ pakhat chu la khâwm vawng in ti â, in umnaah in sie ding a nih.”
Deuterawnawmî 26:12
“Kum thum kumâ sâwmâ pakhat pêk kumâ in thil râ suok po po sâwmâ pakhat in pêk zo chun, Lêvi mî hâi dâm, ram dang mî hâi dâm, pâ nei nâw hâi, hmeithâi hâiin in umnaa chun an fâk â, an lo khawsak thei vêna dingin in pêk ding a nih.”
Deuterawnawmî 26:13
“Chun, LALPÂ in Pathien hmaah, ‘I thu mi pêk, i thupêk po po angin kan inâ inthawkin thil inthieng hâi chu kan sie suok â, Lêvî mî hâi dâm, ram dang mî hâi dâm, pa nei nâw hâi dâm, hmeithâi hâi dâm kan pêk ta â; i thupêk chu a ieng khawm kan bâw siet naw â, kan theinghil bawk nawh.”
1 Samuêl 8:15
“In thlâi chî lê in grêp huon hâia mî chu sâwmâ pakhat lâkpêk a ti chêu â, a siehlâw hâi lê a hotu hâi pê’ng a tih.”
1 Samuêl 8:17
“In berâm ruol lâia mî chu sâwmâ pakhat lâkpêk a ti chêu â; chun, amâ siehlâw hâi nî’ng in tih.”
2 Krâwnikul 31:5
“Thupêk chu phuong dar a ni phing le chun Israel thlâ hâi chun bû dâm, uoin dâm, khuoizû dâm lê lo hma suok po poa râ hmasa tak hâi chu tam tak el an hung pêk tâwl â; thil po poa sâwma pakhat khawm tam tak el an hung pêk tâwl â.”
2 Krâwnikul 31:6
“Juda ram khawpui hâia um Juda lê Israel thlâ hâi chun bâwng lê berâm hâia sâwma pakhat dâm, an Pathien LALPÂ kuoma thil inhlân sukthieng ta hâi dâm chu an hung châwi â, a bûm bûmin an hung sie â.
2 Krâwnikul 31:12
“Chun, thilpêk hâi, sâwmâ pakhat pêk hâi, thil inhlân hâi chu ringum takin an hung lâk â; chû chunga chun Lêvî mî Konania chu a ro rêltû a nih; a ûnâupa Simei chu a dawttû a ni â.”
Nehemiâ 10:37
“Kan Pathien in pindanâ thiempû hâi kuoma kan bei hmet hmasa tak dâm, a thênâ thênâ kan thil inhlân hâi dâm, thing chi tin rêng râ hâi dâm, uoin lê hriek châwi ding dâm; kan loâ mî sâwmâ pakhat Lêvî mî hâi pêk ding dâmin dân kan tâ dingin kan siem bawk â, annî Lêvî mî hâi chun kan khuo lâia lo hmâ nei khuo taphawta sâwmâ pakhat an lâk hlak a nih.”
Nehemiâ 10:38
“Chun, Lêvî mî hâiin sâwmâ pakhat an lâk lâiin Aron thlâ thiempû chu Lêvî mî hâi kuoma chun an um ding a nih; Levi mî hâi chun sâwmâ pakhat an ilâkâ sâwmâ pakhat chu kan Pathien inah ro sie khâwmna pindana chun an hung sie ding a nih.”
Nehemiâ 12:44
“Chun, chû nî chun thâw lâwm hâi, a thênâ thênâ thil inhlân dâm, thlâi thar hmasa tak dâm, sâwma pakhat dâm, sie khâwmna pindan hâia hotû, dânin a ruot ang thiempû lê Levi mî hâi chanvo khaw tin lohmâ izir ang pei la khâwmtû ding hâi an ruot â; Juda hâi chu rawng bâwltû thiempû lê Levi mî hâi lei chun an lâwm hle â.”
Nehemiâ 13:5
“Khâ hmaa Lêvî mî hâi, hla saktû hâi, kawtkhâr vêngtû hâi chanvo, bei phit thil inhlân dâm, rim inhnik dâm, bûr lê bêl hâi, bû sâwma pakhat dâm, uoin lê hriek lê thiempû hâi tâ ding a thêna thên thil inhlân hâi an siena hlak pindan lien tak Tobia tâ ding chun a buotsaipêk a.”
Nehemiâ 13:12
“Chuongchun, Juda mî hâi po po chun, bû sâwmâ pakhat dâm, uoin dâm, hriek dâm thâw lâwm sie khâwmnaa chun an hung lâk khâwm tâwl â.”
Malakî 3:8
“Mihriemin Pathien chu â’n rûkpêk ding am a ni? Nangnî chun in mi la inrûkpêk rawp el hi. Nisienkhawm, nangnî chun, ‘Ieng âm kan inrûkpêk che â?’ in ti â. Sâwmâ pakhat pêk hâia lê thil inhlân hâia hin a nih.”
Malakî 3:10
“Ka ina chun bû a um theina dingin, sie khâwmna ina chun sâwmâ pakhat po po chu hung la unlâ, chu taka chun mi fie ro, sipai hâi LALPÂ chun a tih. Vân tukver hâi hung hawngin, a siena ding um nâw khawp rauin, mal sâwmna chu ka hung burpêk nâw hrim chêu am.”
Mathâi 23:23
“Nangnî Dân inchûktirtû lê Farisâi vervêk hâi, in chung a rik! pudina dâm, mohuri dâm, zira dâm chu sâwma pakhat in pêk hlak a, dân thu pawimâw lem felna dâm, lunginsietna dâm, ringumna dâm chu in ngâithâ sî hlak; ni sien lâ khawm, chuong chu a ni in sawnnâw in thâw ding chu, a dang hâi chu thâw ṭhul chuong loin.”
Lukâ 11:42
“Nangnî Farisâi hâi, in chung a rik ie! Pudina dâm, pardi dâm, thlâi tin rêng dâm sâwmâ pakhat in pêk hlak â, felna lê Pathien hmangaina chu in ngâithâ hlak si â. Nisienkhawm, chuong chu a ni in sawnnâw in thâw ding chu, a dang hâi chu thâw ṭhul chuong loin.”
Hebrâi 7:2
“Amâ chu Abraham-in iengkim sâwmâ pakhat a pêk â. A hming umzie chu a hmasa taka Felna Lal a ni â, a dawta Salem lal a ni bawk â, chu chu Remna Lal tînâ a nih.”
Hebrâi 7:4
“Chuongchun, chi thlâtû Abraham-in a râl lâk ṭha po sâwmâ pakhat a ipêk chu, chu mihriem ropui ziet chu ngâituo ta û.”
Hebrâi 7:5
“Lêvî thlâ hâi lâia thiempû sin chang taphawt chun Dân thû angin mî hâi kuomâ inthawkin sâwmâ pakhat lâkna thû an hmu ngêi a nih, chu chu an ûnâu hâia inthawkin a nih; chuong hâi chu Abraham ṭhâlbeâ insieng ni hâi sien khawm;”
Hebrâi 7:6
“Amîruokchu, annî lâia thlâtu hâi sui sâ vê nâw khan Abraham-a inthawkin sâwmâ pakhat a lâk â, thutiem hâi vawngtû chu mal a sâwm ta si â.”
Hebrâi 7:8
“Chun, hi taka hin mihriem thi hlak hâi hin sâwmâ pakhat an hmu hlak â, chu taka ruok chun, “a hring zing,” tiâ a thû an inhriettir chun a hmu a nih.”
Hebrâi 7:9
“Chun, Lêvî sâwmâ pakhat la hlaktû hmanin, Abraham kuta khan sâwma pakhat a pêk tah, tî thei.”
—–
Sâwmâ pakhat lê inzawmâ zâwnâ um thei hâi:
Q.1. Sâwmâ pakhat umzie hi ieng am a ni â?
Q.2. Sâwmâ pakhat hi Bible-ah khâw lâi hmunâ am ziek a ni â? Vawi ieng zât am ziek a ni â?
Q.3. Ieng hunâ inthawkin am a hung inṭan â?
Q.4. Khâw lâi hmuna inthawkin am a hung inṭan â?
Q.5. Ieng leiâ am an lo pêk hlak am nî’ng a ti â?
Q.6. Pêk ngêi ngêi ding tînâ a nî?
Q.7. Thu thlung hlui lê thu thlung thar a sâwma pakhat hril dân hi an inang am?
Q.8. Sâwmâ pakhat lo pe ta nâw inlâ ei vânram fê ding a mi dâl thei ding am?
Q.9. Sâwmâ pakhat pêk hi a ṭha am? A ṭha chun ieng leiin am a ṭha â? Ieng am hlâwkpuinâ, thlarâuâ inṭhang liennâ nei thei ei ti â?
Q.10. Sâwmâ pakhat ei ipêk hi, ei hlâw suok po poâ (gross) mî ei pêk ding am annâwleh ei hlaw â mî lâk thlâk hnunga (net) a la um poâ mî ei pêk lem ding?
[Sunzawm ding]
Be First to Comment