Genesis 3:19 ei tiem chun, Eden bâwsietna leiâ Pathien-in mihriem kuomâ thu a pêk chu, ‘I hmâi thlantui luong rak khawpin bû fa tâ’ng i tih’ tî hi a nih. Hi lê inzawmâ ei hriet ding chu, sin thâw hi Pathien-in mihriem tâ dingâ a ruot a ni â, inrim takâ sin thâw dingâ thupêk ei ni bawk. Chu ding chun, taimâk a ṭûl â, taimâk ding chun, Pathien thupêk âwi/ring a ṭûl bawk. John Calvin, Reformer ropuiin “Sin thâw hi Pathien bieknâ a nih” a lo tî angin, sin thâw hi khawvêlâ inthawkâ suok an’ (a ni) naw â, Pathien-â inthawkin thupêk ei dawng a ni lem. Khrîstien Nun Puitling ding chun taima takâ sin thâw ding ei nî thû tâwitê’n hang ngâituo nâwk ei tîu.
Bible-â sin thâw â’n langna (a inlang) ṭhenkhat hâi: Genesis 4:1-7-â ûnâu hmasa tak Kâinâ lê Abel hâi kha, ran vâi lê lo sin thaw â fâk zawng an nî thû ei hmu. Mihriemin hlû ei tî chu, pawisâ dâm, lunghlû dâm, rângkachak dâm a ni â. Lal Solomon chun sin thâw taimâk ṭhat ziet lê hlut ziet hieng ang hin a hril lem, ‘Taimâkna chu mihriem ro hlû a nih’ tî lê, ‘Kut taimâ ruok chun amâ chu a sukhausa â’ tiin (Pro. 12:27; 10:4b). Thabo lê dâwngda takâ sin thâwtû, hmabâk lê ngîrhmun ding chu pasietnâ a nih (Pro.10:4). Solomon Thuvar hâi ngun takâ ei tiem chun sin thâw hi, Pathien ṭawngse phur ni lem lovin, thabona lê dâwngdatna hi Pathien ṭawngse phur a ni lem.
Thuthlung Thar tieng hang bî zawk inlâ. Thessalonika mî hâi khan, Îsû Khrîstâ a hung nâwk el dingâ an ring lâiin, Tirko Paula chun Thessalonika mî hâi chu ṭhung tluong el lovâ, mânî sin seng ngâisak â, mânî kut ngêiâ sin thâw tum tlat lem dingin â’n fûi (a infûi) lem a nih (I Thes.4:11). Tirko Paula Lêkhathawn hâi ei tiem chun, Tirko Paula hin mi thabo nasa takâ a demna thû ei hmu â. Paula chun, thabona hi, khêl lê suol sin thâw a nînâ hril zawmin, Kret thlîrkârâ chêng hâi lem kha chu, ‘thabo virkâwng’ a ti hiel a nih (Tita 1:11). Thabonâ a dem lâi zingin, taima dingâ mî â’n fûina (a infûina) thû ‘…tû khawmin sin a thâw nuom nâw chun, fâk khawm fa nâw râw se’ tî a nih. A chieng fek fawk hlê. Na nei chun hre mawl râw se (2 Thes. 3:10).
Tû lâi ṭhang thar lê sin thâw:
Pî le pû hâi chanchin tiemtu hâi chun, ei hriet â, ei pî le pû hâiin thil an ngâi sâng lê ngâi hlut zâwng chu, mi huoisen, mi taimâ lê mi tlâwmngâi an nih. Pî le pû hâi tuol chaina khawvêla khan, mi thabo lê thabo insûng chu, mî hmûsit hlâw lê nuhmei-pasal ding khawmâ mî dit lo an nih. Ei hriet ta angin, ei pî le pû hâi taimâk dân chu, an in (sleep) sûng chauin an âwl a nih.
Ei tû lâi khawvêl hma sâwnnaa ruok chun, ṭhang thar hâiin, kut sin thâw lê sin thâw thuomhnâw inbel nuom lo lê sin thâw dingâ kal pên suok ei tlâwm deu deu. Ṭhang thar tam tak, nû le pâ thâw suok sâ ringawt ringsanâ, nuhmei pasal nei vê ṭhuoi lê ‘mi pe rawh’ tî inzak inphaka khawm ngâi ta lo kutdâw ṭhalâi ei pung hrât. Hun la hung tlung dinga, sûngkuo châwmtû lê enkawltû ei tlâwm tiel tiel a, châwmhlâwm ding nambar hlak ei kâi sâng deu deu. Chuong ang peiin mânî nâu hâi sin thâw dingâ tirtû, nû le pâ ei tlâwm deu deu bawk. Sin thâw lê lêkha thiem ngêi tumâ taima takâ ṭhang lâk nêkin, ṭawngbâuvâ fâk zawng ei pung tuol tuol. Inrim takâ sin thâw nêkin, politic hi sum hnâr lê hausakna dingâ, a kâwitanâ ngâi pâwl ei pung zing bawk. “Vawisûn ie’m (ieng am) i thâw ding?” tiâ hei indawn châng, a ngampâ takâ, ‘Ka hriet nawh’ tî rin ta lo hlak ei bo nawh.
A chungâ ei târ lang hâi khi, a san ding ie’m ni tâ’ng a t’â (ti â)? Ei khawvêl hma sâwnnâ ei hmang thiem nâw am? Ei Pathien Thu hriet lê pawm dân theology, â’n dik (a indik) tâk nâw lei lem? Pathien Thu pawm dân indik chun, taimâknâ a hring suok â, pawm dân indik nâw ruok chu, thabonâ a nih. ‘Pathien hi ieng tik lâi khawmâ taimâ takâ sin thâw zing a nih’ tî ringtû chu, a thâ a bo thei nâw hrim hrim a nih. Khrîstien Nun Puitling innghatna bulpui ding, Sâm ziektû’n hieng ang hin a hril â, “I kut sin inrim râ hi i fâk phât chun, lâwm takin um i t’â… Ngâi tâ, Lalpâ ṭi mî chu, chuong ang chun mal sâwmin um a tih” (Sâm 128:1-4). Chun, mi hrisêl tak ni zing siâ, taima takâ sin thâw pei sî lovâ, kutdâw lungril put, mî ṭhangpuina lê sawmdâwlnâ ringawtâ innghat hâi hi, Khrîstien Nun Puitling le â’n âihal (a inâihal) tlat a nih. Pathien taimâ lê ringum a nîna nun inṭâwmpuitû chun, amaa Khrîstien Nun Puitling râ hmu ding a um ngêi hlak. Ieng sin khawm thâw inlâ, mi puitling nî lê nî nâw inlangna chu, ei sina ei taimâk lê taimâk nawa â’n lang. Taimâkna tieng hin, puitling tieng pan tum ṭâl ṭâl ei tîu.
Be First to Comment