A Luâ, Inhrûkna Puon Chu, Ziel Saâ Mâksanin, A Tho Nâwk Tah – Rev. Cliff Kawldinglien Joute

Dâwr, sumdâwngna hmun, sawrkâr pîsâ lê Biek in hâi chu khâr ni sien khawm Lal Îsû Khrîstâ thlân ruok chu thlân lê a chârna seal chu hawngin, an dâl tumna chu thlâwnin; Îsû Khrîstâ chu thînâ hnêin ropuitakin ‘A Tho nâwk Tah!’.

“Chun Simon Peter khawmin a hnunga a hung hnawt phâk â, thlân sûnga a lût â; puon zâi inhmi hâi um lê, A luâ inhrûkna puon um chu, puon zâi inhmi hâi lâiâ um lovin, ziel sâin hmun danga um a hmu â” (Johan 20:6-7).

Chanchin ṭhâ Johan ziektûin hi lâi thû hi ieng leiâ a ziek lang kher am, ieng am mi hril hriet a nuom â? Ei tâ dingin ieng am a pawimâwnâ? tî ei hriet chieng theina dingin khâng hun lâiâ Juda hâi nunphung hang sui hmasâ;ng ei tih.

Bible khawvêla khan mî an thi phât, mî thi sûng hâi mâw phurna chu mî thi insil fâitir, a ruong puon zâi inhmiâ tuom, a kut a âwm bâwrâ inumtir, a mit meng insîmtir, a bieng fâwppêk, a hmâia inhrûkna puonâ inkhum lê thlânâ phûm a nih. Îsû Khrîstâ ruong chunga khan Joseph, Arimathai khuo lê Nicodem hâi khan an thâw vê ngêi ring a um (Johan 19:38-40).

Siehlâw chun a pû tâ dingin thlâithleng a buotsai huna inhrûkna puon chu dâwkânah, a pû dit dân ang takin ṭha takâ thlepin a sie hlak â. Siehlâw chun a pû bu fâk chu thlîr zingin, a pû bu fâk zo hmâ khat chu dâwkan chu a tâwk a thieng nawh.

Chun, a pûin bû a fâk khawp chun inhrûkna puon fel takâ Siehlâwin dâwkânâ a sie chu a kut, a hmur lê a khâkhmul chu a hrûk fâi zo hnungin thlep lovin dâwkânah siein a mâksan chun Siehlâw chu a pû bu fâkna chu a inthiel fâi thei tînâ a ni â, inhrûkna puon thlep lo chun ‘bu ka fâk khawp tah’ tî hril kher ngâi lovin a inentir a nih.

Amîruokchu, a pûin inhrûkna puon ṭha takâ thlepin dâwkânah a mâksan ruok chun ‘ka la fâk zo nawh, ka la hung fâk nâwk ding, tâwk a la thieng nawh’ tî a inentir a nih.

Chun, a inentir dang nâwk chu, inhrûkna puon thlep sâin a pûin a mâksan chun, ‘thlâithlêng ka tâ dingâ i mi buotsaipêk kha ka lâwm â, ka tlai hlê a nih. Ka la hung kîr nâwk ding, hî dâwkâna ngêi hin’tî inentirnâ a nih.

Ûnâu dit tak, vawisûn hin Îsû Khrîstâ chun, nang lê keia tâ dingin Kalvari thing khrâws-ah intlana sin thâw zovin, ei suol man bat po po a bo, â bâng um lovin “A kin tah” tiin, a mi tlâkpêk vawng tah. Halleluiah!

Îsû Khrîstâ-in intlanna sin a thâw zo tah. Thîna phuor a sût tah. Thinâin a dâl zo ta nawh. Îsû Khrîstâ a tho nâwk tah! Amen!

Inhrûkna puon ziel sâ hmangin, ‘Ka la hung kîr nâwk ding’ tî inchiknâ a mi mâksanpêk â. Hi hî ringtu hâi tâ dingâ ‘Beiseina Lâwmum’ (Tita 2:13) lê ringtu hâi tâ dingin Chatuon khuo a la var ngêi ding a nih tî mi inhriettir a nuom a nih.

Ûnâu dit tak, a m intlantû chun nang lê keia tâ dingin inhrûkna puon a mi mâksanpêk â. Mi mâksan sawng pêk nâw ni. Suolâ inthawk ei zalênna dingin a thisenin a m intlan ta â, a intlansâ hâi mi lâwr khâwm dingin a hung nâwk ding a nih.

Îsû Khrîstâ chu a mi thienghlim hâi lâwr khâwm dingin a hung nâwk ngêi ding thû Bible-â Thuthlung Hlui-ah vawi 1, 500 a hril â. Thuthlung Thar-â Bible chȃng 25 peia châng kâr 1 hin, Îsû Khrîstâ hung nâwkna ding thû, direct-in a hril. Bible-in Îsû Khrîstâ khawvêlâ a hung ding thû a hril zâtin, a hung nâwkna ding thû vawi 8 a hril lang sâ zie bawk. Îsû Khrîstâ ngêi khawm khan a hung nâwk ding thû hi vawi 21 lê inring zingâ um dingin vawi 50 a hril a nih.

Îsû Khrîstâ hung nâwk hunâ ringtu hâi ei ham ṭhatna ding hang ngaituo nâwk ei tih.

1)      Tû hin rethei, beidawng lê rinumin um hrî inlâ khawm chatuon khuo a var phât leh ei la hausa ding a nih.

2)      Tû hin in ṭawp takin, hnuoiah chêng inlâ khawm, nakie phât, Chatuon Khawpui (Lung man tam khawpui) thar ei la hluo ding a nih. Chû hmun chu rethei nâu hâi (ringtu hâi) hluo ding lê chêngna hmun ding a nih.

3)      Chatuon khuo a var phât, Khrîstâ hming leiâ tuisik no khat, i lo sêng kha hriet fûk ni tâ’ng a ti â. Dam lâi khawvêlâ dûthu sâm chang phâk lo leiâ, indawm kûn rawng rawng hâi tâ dingin, chatuon khuo a la var ding a nih.

4)      Piengsuol kebai hâi, damnâw tinrêng hâi lê rethei nâu hâiin, Lung man tam khawpui tuolah Sandamtû châwimâwiin Sakhî angin ei la inchâwm phat phat ding a nih.

5)      Chatuon khuo a var huna, thisenâ intlan vê lo, Vântirko lê Angel hâi sak phâk lo ‘Hmangaina mak’ hla mâwi rem tâ’ng ei tih.

6)      Chatuon khuo a var phât chun, Sandamtu Lal Îsû Khrîstâ hmêl hmu tâ’ng ei ti â, ei lungngâina mittui po po mi hru hulpêk tâ’ng a tih. Chû huna chun, khawvêl lâwmnâ lê hlimnâ intem vê phâk lo hâi, rinum um thlawk thlawkâ hringnun hmang hâi tâ dingin chatuon hlimnâ ei chên ding a nih. Âw a va inhawi âwm ngêi, chatuon khaw var ding hi beisei takin nghÛk ei tîu.

7)      Chatuon khuo a var phât, hmangai lungzuor ei lo ṭhe ta hâi leh intuok khâwmna ropui um a tih.

Îsû Khrîstâ hung nâwkna beiseitû hâi lê, A tho nâwknâ inṭâwmpuitû hâi in rêngâ kuoma, SHALOM um râw se. Âmên!