Thil hrim hrim hi, mihriem hin ṭha tî zâwng lê dit dân bîk rieu ei nei hlak. Mî tû khawm Pathien Thû nêkâ mânî ngâi dân ṭhâ tiâ ngâi pawimâw lê fêpui hlaktû chu, Pathien-in a hnâwl hlak a nih. Hî thû hi, Saula hringnuna fel takin ei hmu. Saula chun Pathien Thû ni lo, amâ thû, ngâi dân lê ṭhâ a tî angin a fêpui leiin Pathien-in Israel lal a nînaâ inthawkin a hnâwl a nih (I Sam. 15:1-35).
Thuvar hâi 3:5-naa chun, ‘I lungril po poin Lalpâ chu ring lâ, nangmâ hrietnaa chun innghat nâw rawh’ tî ei hmu â. Hî thuâ inthawkâ ei hriet ding chu, Pathien hin mihriem-â innghat, mânî hrietna lê varnaâ innghat hâi chu a hnâwl hlak a nih. Mihriem varna hi Pathien chun a ngâi nêp â, Pathien rawng bâwl ding chun mihriem varnaâ inthawkâ hmasuon chî an’ (a ni) nawh. ‘Hî khawvêl varna hi Pathien ngâiâ invêtnâ a ni si â’, tîin Paula chun a hril (I Kor. 3:19). Chû leiin, mihriem varna lê thil thâw theinâ ei suong sûng po chun Pathien Thlarâuvin mi hnai ngam ngâi nâw ni â, Pathien-in mi hmang ngâi bawk naw ni.
Saulâ’n a mi mal ṭhahnem ngâina lê sâkhaw mî a nîna tukverâ inthawkin, Pathien tâ dingâ ṭha hlê dingâ a hriet, râllâk thil ran ruol a ṭha lê a thâu, hmêl hem lo inthâwina dingâ Pathien-in a phût ang chî hâi chu a tîsa hrietna lê rem hrietnain Israel ram tieng, Pathien tâ ding tiin a phur ta ṭeu el â (I Sam. 15:9). A sâkhaw mî nînaâ inthawk thlîr chun âwm hlêin, Pathien tâ dingin, ṭhahnem ngâi hlê angin inlang sien khawm, Pathien chun a kuomâ inthâwina thilpêk nêkin a thu âwi a ngâi pawimâw lem thû ei hmû a nih (I Sam. 15:22). Thilpêk tam tak pein, thâwlâwma tam tham tak pe hlak inlâ khawm, Pathien thû ei âwi sî nâw chun, Saula chan hi ei chan a ni vê a nih. Ei Pathien hi thilpêk ringawtâ tlawn lungâwi chî an’ nawh.
Pathien-in a phût lê a dit lem chu, A thû âwiâ thuhnuoi rawl takâ amâ lê lêng hmunkhat hi a ni lem (Mika. 6:8). Chû leiin, Pathien-in ei puo tieng mâwinâ mi en lovin, ei sûng tieng felna lê ṭhatnâ hi hmû a nuom lem a nih. Sâkhaw mî takin inlang tumin inlâ, ursûn hlak inlâ khawm, sûngrila Pathien lê inzawmnâ ei nei sî nâw chun, umzie nei chuong nâw mei nih. Îsû Khrîstâ-in Lêkha Ziektu hâi lê Farisâi hâi chu thlân lung nâl vâr, puo tienga mâwi takâ inlang, a sûng tieng ruok chu mî thi rû hâi lê hmunhnawk tinrêngâ sip hâi a tî angin, einî khawm Îsû Khrîstâ einia â’n lal (a inlal) tak nâw chun, ieng angin inti sâkhaw mî inlâ khawm, thlân lung nâl vâr ang tho nî’ng ei tih.
I Samuel 15:24-ah, “Thil ka suksuol dêr a ni chu, Lalpâ thupêk lê I thu chu ka lo bâwsiet a ni zing chu tie, mipui hâi ka ṭi â, an râwl ka lo ngâi leiin” tiin Saula ṭawngbâu ei hmû a nih. Saula chu mipui ṭha ti zâwng, a rawng a bâwlnaa Pathien pawi tâwk a ni ta zing lem â. Chun, kohran ro rêltû, khawtlâng ro rêltû lê mipui hâiin ei hriet dingâ pawimâw ka tî chu ‘mî’n an tih’, ‘mipui an chier nasa taluo, mipui lungâwi nâw pal an tih’ tî hâi hi dâwn lê ngâiven ding a nî lâi zingin, mipui râwl hi Pathien dit dân a ni vawng kher naw â, mipuiin ṭhâ an tî lê mipui vêng taluo hi Pathien dit dân a ni chuong kher nawh.
Democracy ro rêl dâna chun, a tam lem thû chu a ṭhâ tî a ni hlak. A tam lem hâi chu Pathien dit dân a ni nâw châng khawm a um hlak. Aron chu Israel mipuiin rângkachak bâwngte lim siem dingin an nawr â (Exo. 32:1), a siempêk ngêi â, chu chun Israel hâi chunga Pathien lungsennâ â’n tlungtir a nih (32:7ff). Pilat chun mipui suklungâwi a tum leiin, Îsû Krista Khrâws-â a hem dê a nih kha (Mk. 15:15).
Chuleiin, Vox populi, vox Dei (The voice of the people [is] the voice of God), ‘Mipui râwl hi Pathien râwl a nih’ tî ni hlak sien khawm, Pathien dit dân a kal chun, Pathien râwl a ni thei naw â, Pathien lungsenna lê ro rêlna chawk suoktû chau a ni lem hlak a nih.
Ro rêltû hâi chu Pathien ruot an ni â (Rom 13:1), ro rêltû sin pawimâw tak chu, mipui hâi Pathien dit dâna ṭhuoi a nih. Mipuiin an ṭhuoi lem ro rêltû a ni chun ro rêltu indik, Pathien ṭî mî ni thei ngâi nâw ni. Mipui nêkin Pathien ṭî a um â, mipui nêkin Îsû Khrîstâ dit dân lê â’n chûktir (a inchûktir) dân ngâi pawimâw lem ding a nih.
Pathien-in a ngâi pawimâw lê a ngâi hlut hi ei ngâi pawimâw sûng chu, Pathien-in mi umpui a t’â (ti â), ṭhangpui ei ṭûl huna mi ṭhangpui hlak a tih. Ei nia Îsû Khrîstâ ei inlaltir naw â, Pathien dit dân nêkâ mihriem mit hmua mâwina lê mi mî’n pâk (mi inpâk) hlâw ei ngâi pawimâw sûng chun, ringtu ṭhâ ni ngâi nâw mei nih. Ei ngâi dân hi â’n dik (a indik) tak niâ ei hriet sûng lê ei ngâi dân fê thlengpui ei tum sûng chun, Pathien-in mi ṭhuoi ngâi bawk nâw ni tî hi hriet a ṭhâ. Pathien dit dân ngâi pawimawâ zâwm thei dingin Pathien kuoma inhlân thar ei tîu.
Ro rêlna chu Pathien tâ a nî leiin, ro rêltû chun, Pathien nâu hâi, mi chîn lê mi lien a hmu fûk rawp ding a nih. Mi hnuoihnung lê mi thil thâw thei a thlier hran ding an ni nawh. Lalpâ ngâia, âwm lê mâwi zawngin, Lalpâ hmaa a tlu lût rawp ding a nih. Chuong ang ro rêlna chun mî a sukna ngâi naw â, hmangainâ a tungding lem hlak a nih.
Be First to Comment