Mi ṭhenkhatin, “a ṭha nâw khawm a ṭhâ” an tî ka hriet ta hlak. Pathien thu hriltû hâi khawmâ an hril ka hriet ta hlak bawk. Kawng dang dangâ hril thei a nih. Tû lâi, hrî leiâ sorkar-in inkhârkhip (lockdown) a puong khawm hi, mi thabo deu tâ ding chun sin thâw lovâ fâk zing theinâ a ni â. Exam lo khawmâ, hmun ṭhenkhata chu, pâwl sawn theina khawm a nih. A ṭha tiengâ hril chun, hlâwsamna hâi hin, taimâkna lê tumrûnâ a mî’n neitir tînâ khawm nî’ng a tih. Thlîr dân ki dang deuvâ hei thlîr chun, harsatnâ, tuorna lê rinumna hâi hi suol inhrietna lê Pathien tieng tlûk lûtna hmangruoin â’n chang thei bawk tî’ng an tih. Hi lê inzawm hin, Sâm ziekin a lo hril hi hei sê nâwi vak ei tih.
Bible-ah, Sâm ziektûin, “Sukrinrumâ ka lo um hi ka tâ dingin a ṭhâ a nih, i thu ruot (dân) hâi kâ’n chûk theina dingin” (Sâm 119:71) a ti â. Sukrinum a tî hi, tuornâ (affliction) khawm tî thei a nih. Ei ṭawngâ sukrinum tî hi ka lo ngâi vê dâna chun, harsatna lê tuorna satlie el an’ (a ni) nawh. Thâw suol lei khawmâ, thâw suol nâw lei khawmâ, ei chunga mi dangin, rinumna lê hneng dêna hnuoiâ tuor lê hnâw deâ a mî’n umtirnâ hrilnâ a nih. Sâp Bible-a chun, ‘afflicted’ a ti â. A umzie chu, intuortir ei tî ang hi a nih. Ieng khawm ni sien, Sâm ziektûin a hril hi, Pathien-in a chunga, a san lê thil tum neiâ, tuorna lê rinumnâ a siempêk hi a ni â. Chuong ang chun, Pathien-in a dân lê thupêk hâi ei inchûk lê hriet phâna dingin, tuornâ (affliction) mihriem chunga â’n tlungtir hlak a nih. A san lien tak pakhat chu, mihriem hi ei lûlulin, ei chapo hlak leiin, a kuom tieng ei kîr â, amâ ei zawng theina dingâ sukrinumnâ hi, hmangruoin a hmang hlak a nih. Hi hi a chiengna chu, Sâm ziektu vêk hin, “sukrinumâ ka um hmâ khan, kâ’n vâk hmang hlak â. Tû ruok hin chu i thu ka zâwm tah” (119:67) a tî a nih. Israel hâi chunga khawm, Pathien-in hî sukrinumnâ hi, a mî hâiin a kuom tieng kîrna châng an hriet theina dingin hmangruoin a hmang rawp hlak a nih. Keimâ chunga khawm, sukrinumnâ tling zo êm nâw sien khawm, harsatna tam tak hung tlung hâi hi, Pathien ka hnai phânaâ inchang a um hlak.
Khawvêlâ harsatna hung tlung mêk hâi hi, mihriem chunga Pathien kut thlâknâ niâ ngâi pâwl khawm an um â, thil ni thei khawm a nih. Amîruokchu, mihriemin harsatnâ ei tuok po po hi Pathien intum vawng ding lem chu ni nâw’ng a t’â (ti â), a dawngtûin a lo hmang thiem ruok chun, a ṭha nâw khawm a ṭhâ hung ni thei a tih. Hrî leiâ khawsak nunphung pângngâi lovâ ei umna leiâ, Pathien kuoma ei tlûk lûtna po po lê sermon ṭha tak tak internet-â inthawkâ lung lût takâ ei lo ngâithlâk dâm, sûngkuo mâichâm, sûngkuo kimâ nei theiâ ei um dâm, damdâwi thâw hâi thâw lona dâm, nâu hâi lêng lo dingâ hril hril ngâi hâi, hril hran ṭûl ta lo lê ṭawngṭâinâ tam nâwk zuol ei nei phâna dâm hi a ṭha nâw khawm a ṭhâ a lo ni thei a nih.
Mihriem hin mal sâwmnâ ei hei dawng met chângâ, mal sâwmnâ petû tieng en ta lo â, ṭhenum lê ûnâu hâi hei en hnuoi el awlsam ti khawm ei tam â, chû leiâ sukrinum ṭûl khawm ei um hlak. Israel lal David khawm, hnênâ changin, ram a lâk duok duok â, lalâ siemtû lê inhnêtirtû, Pathien hre fu ta lovâ, amâ hrâtna suongâ a sipai hotu Joba nuom nâw saâ ram sûnga mihriem census a hei inthâwtir zet khan chu, tuorna nêp lo deu deu pathum, Lalpâ Pathien-in â’n thlangtir el a nih. Amîruokchu, hmangaitû kut thlâk a nî leiin, a bohmang ruok chu a phal nawh, ṭhuoi kîrna hmangruo chau a ni lem.
Mihriem lungril put zie â’n ang naw â, vawi khat vuok â thil po po puong lang el ei um lâi, Pharo angâ tuorna chi tin rêng tuor hnung khawmâ lûlul tlat ei um. Hrî inlêng leiâ harsatnâ, Pathien hnai phâna lê a hmangainâ hriet phânaâ hmang, mî tam tak an um mêk laiâ, nun danglam chuong lo tam tak um bawk an tih. Ka lûlul lê dawnsak lo leiin, Pathien ro rêlnâ hi pumpel thei ding hlak ni lo a ni â. Tû tâ lûlul takâ thawveng deuâ um hâi hi, Joba tuorna angâ dâwl zo ding hlak um ei ni si naw â. Suol simâ, Pathien kuoma tlûk lûtna châng hre hâi chu, mi hamṭhâ nî’ng an tih. I lo ngâituo vê hlak am? Pathien hnaina châng hre nâw laklâw hâi hi chu, Bible-in a tî (hril) angin, an lungril thîrlingâ bel ang elin an lûlul deu deu hlak chu tie. Chû hmun ei tlung hmâin, ei thil tuok mêk hin mi sukthar sien, sukrinumâ ka um hi mal sâwmnâ a ni lem ti thei hlau inlâ nuom a um de!
Mi var chun, tû tâ (present) ngîrhmunâ inthawk hin, nakie tiengâ thil la hung um ding a ngâituo â, vawisûnâ thil tlungâ inthawk hin, zîngâ tlung ding a hisâp (ngâituo) hlak. Vawisûnâ ei thil tuok mêk hin, fâk le dâwn (economic) tienga, ie’m (ieng am) chen am nghawng nei a t’â? Khawvêl ro inrêlna tienga, ieng tiin am boruok hung inhêm a t’â? Khrîstâ hung nâwknâ beiseina kawnga, ieng chen am Pathien dâw theina lê hunbi ruot hi sukfamkim nî’ng a t’â? Khrîstâ’n a kohran hâi a hung ṭhuoi nâwkna ding inchikna hi, ieng tiin am sukdikin a um t’â? tî hâi hi ngâituo hlak an tih. Mi invêt lê kâwmâw hâi ruok chun, chuong po po chu ngâituo lovin an hmû hmû fain, dâwn an t’â, a hun a tlung phâ, beidawngin khêk an tih. Ûnâu dit tak, Pathien dâw theina lê zângâinâ hun hi a la kin ding a ni si â. Lalpâ tâwtawrâwt â’n rîk phât chun, hun um nâwk ta nâw ni â. I tâ dingin, chatuon khawvar mâwi tak hi a hung inher suok vê dî’m (ding am)? Ei tû hun mêkâ inthawk hin, nakie tiengâ thil tlung ding thlîrin ei hringnun hi hmang ei tîu.
Kum zabî 17 lâiâ, French ramâ thiempû (monk) pakhat, Brother Lawrence an tî chun, hieng hin a hril an tih. “Pathien hmangainâ ei hriet tak zet chun, ieng kim dawng dân thiem ei tih … a thlum lê a khâ khawm” (If we know how much God loves us, we will always be ready to receive equally … the sweet and the bitter) a ti â. Hi hi, Pathien nîna lê mizie (character) ngâituoâ a hril a ni â. Bible khawmâ, “Pathien chu hmangainâ a nih” a ti â. Pathien hin a hmangainâ leiin, a Nâupa neisun (thil thlum) a mi pêk â. Ieng angâ suol lo ni inlâ khawm, simâ a kuoma ei tlu lût phawt chun, a mi lo ngâidam hlak. Chun, ami hmangai lei bawkin, amaâ inthawkâ hla tak ei fê nâwna dingin, tuorna (thil khâ) khawm a mi pêk bawk. Thil thlum ngawt ei fâk chun, ei hahnî (gum) khawmâ a siet phâ thei â, ei thisena khawm mamâw tâwk nêkin, a thlum a tam thei. Chuong ang bawkin, thil ṭhâ lê hlâwtlingna vawng hin chu, chapona lê uongnâ nei a awl â, Pathien hriet fûk nâw thei khawm a nih. Chû leiin, Tirko Paula khawm, hling (rinumna, hrât nawnâ, tlâksamnâ) pêkin a um â, a beidawng khêk, Pathien dawnna chu, “ka lunginsietnâ i tâ dingin a hun tâwk, ka thil thâw theinâ hi, hrât nâwnaâ inthawkin a nih an’ sawn nâw sukfamkimâ a um chu” tî a nih. A tuorna po po kha, Pathien hrâtna inṭâwmpui theina hmangruo a nih tî a hriet â. Chû leiin, “ka hrât naw po leh ka hrât hlak” a tî a nih (2 Kor. 12:10). Tlâng chungâ Îsû thu hrila khawm, “Thlarâuvâ pasie ni tî inhre hâi chu an ham a ṭhâ, vân ram an tâ a ni si â” (Mtt. 5:3) a tî a nih. Vawisûnâ thil ṭha nawâ ei hriet hâi, ei tuorna hâi hi, Pathien hnai nâwk zuolnaâ ei hmang a ni chun, thil ṭha nâw khawm a ṭhâ hung ni thei a tih.
Be First to Comment